Edıta Zekjırovıc
23 Мај 2022•Ажурирај: 24 Мај 2022
СКОПЈЕ (АА) – Претседателот на Конфедерацијата на синдикалните организации на Македонија (КСОМ), Марјан Ристески, одржа прес-конференција на која истакна дека не е остварена средба и нема одговор на барањата на вработените од Управата за водење матични книги од страна на Министерството за финансии, јавува Агенција Анадолија (АА).
Ристески рече дека штрајкот на вработените од Управата за водење матични книги трае околу еден месец и нагласи дека се незадоволни од односот на Владата кон нивните барања и од нејзиниот дијалог со независните синдикати.
„Треба да седне и да каже 'толку има, нема повеќе'. Да излезе во јавност и да видиме што е реалноста. Нема дијалог“, рече Ристески.
Тој исто така наведе дека за среда е планиран протест пред Министерството за финансии.
На минатата средба претставниците на синдикалните здруженија постигнаа договор за колективниот договор со претставниците на Министерството за правда и Управата за водење матични книги (УЗМК), но штрајкот продолжи сѐ додека да се одобри договорот од страна на Министерството за финансии.
Претседателот на Конфедерацијата, Ристески, истакна дека сè уште нема одговор од Министерството за финансии на нивните барања.
„Јавно кажувам, немаме намера да попуштиме, да видиме што ќе се случи. Најверојатно ќе се најде еден разумен меѓу нив да каже 'Чекајте луѓе да видиме што се случува. Еден месец граѓаните се враќаат за изводи, почнаа да ѕвонат на телефони и да пишуваат мејлови. И никој воопшто не е заинтересиран за ова, навистина не ми е јасно“, рече Ристески.
Вработените во Управата за водење матични книги бараат потпишување колективен договор, линеарно зголемување на платите за 30 отсто и подобрување на условите за работа.
