Admir Fazlagic
05 Април 2017•Ажурирај: 05 Април 2017
СКОПЈЕ (АА) - Претседателот на Република Македонија, Ѓорге Иванов, денеска и утре ќе престојува во работна посета на Република Турција, по повод учеството на 20. Евроазиски економски самит, што ќе се одржи во Истанбул, пренесува Anadolu Agency (AA).
Според соопштението од кабинетот на претседателот Иванов, тој ќе се обрати на свеченото отворање на 20. Евроазиски економски самит, што годинава се одржува на тема „Човештвото на крстосница“, а ќе има обраќање и на претседателската сесија на самитот.
Како што соопштуваат од претседателскиот кабинет, ова е седмо учество на претседателот Иванов на Евроазискиот економски форум, што од 1998 година се организира секоја година.
Годинава е најавено присуство на актуелни и поранешни државници, претседатели, премиери, министри, истакнати личности од општествениот и политичкиот живот, невладиниот сектор и бизнис заедниците од 40-тина држави.
Организатор на Евроазискиот економски форум е Мармара фондацијата, група за економски и општествени истражувања која има за цел унапредување на односите меѓу ЕУ и земјите од централна Азија и Блискиот Исток.
Фондацијата активно е вклучена во јакнење на економските врски, подобрување на регионалната соработка со цел да помогне во максимизирање на можностите што ги создава процесот на глобализација и минимизирање на неговите негативни ефекти.