Енвер Хоџај: „Положбата на Албанците во Прешевската Долина ќе биде дел од мировниот договор со Србија“

ПРИШТИНА (АА) - Вршителот на должноста претседател на Демократската партија на Косово (ПДК) и кандидат за премиер, Енвер Хоџај, денеска ја соопшти програмата на таа партија во врска со положбата на Албанците во Прешевската Долина, јавува Агенција Анадолија (AA).

Хоџај на прес-конференцијата истакна дека Албанците во општините Прешево, Бујановац и Медвеѓа и понатаму се дискриминирани од страна на властите на Република Србија, велејќи дека дискриминацијата е економска и државна, и дека постои сериозна постојана рана на миграцијата.

Тој наведе дека главна тема на секој мировен договор што ќе се постигне со Србија ќе бидат Албанците што живеат во Прешевската Долина.

„Не може да има мировен договор и заемно признавање меѓу Косово и Србија без адресирањето на прашањето за Прешевската Долина и правата на Албанците, и тоа ќе биде клучната точка во идните преговори меѓу Косово и Србија. Второ, на нашата листа за пратеници на Демократската партија на Косово ќе имаме двајца кандидати што ќе бидат гласот на жителите на Прешево во Собранието на Косово“, рече Хоџај.

Тој, исто така, соопшти дека ќе биде усвоен посебен закон што ќе обезбеди законска основа за финансиска, образовна, политичка и културна поддршка за Албанците што живеат во Прешевската Долина.

„Ќе имаме државна агенција како координативно тело, при Кабинетот на премиерот, мојот кабинет, што ќе се занимава со изработка и имплементација на сите политики во однос на Прешевската Долина, а таа агенција ќе има поголема моќ од едно министерство кое би било само формалност“, рече Хоџај.

Најави и отворање на четири нови гранични премини кон Прешевската Долина, со цел да се олесни движењето на граѓаните, и формирање на Фонд за Прешевската Долина, со почетни 5 милиони евра, што ќе се занимава со враќање на оние што сакаат да се вратат во Прешевската Долина.

Одговарајќи на новинарско прашање, Хоџај рече дека како премиер ќе се залага за завршување на дијалогот со Србија со заемно признавање, бидејќи, како што рече, треба да се искористи новиот дипломатски момент со доаѓањето на Џо Бајден на чело од САД, во соработка со германската канцеларка Ангела Меркел, Франција, Велика Британија и Европската Унија.

Се очекува Уставниот суд на Косово да ја објави комплетната одлука со која изборот на Владата на Косово на чело со премиерот Авдулах Хоти се прогласува за неуставен и да се наложи одржување вонредни избори.

Вршителот на должноста претседател на Косово, Вјоса Османи, треба да распише избори што мора да бидат одржани најдоцна за 40 дена од распишувањето.