Димитров-Геминер: Поддршка од ОБСЕ за реформската агенда на Владата

СКОПЈЕ (АА) - Министерот за надворешни работи на Република Македонија Никола Димитров денеска оствари средба со генералниот секретар на Организација за безбедност и соработка на Европа (ОБСЕ) Томас Гремингер, кој престојува во прва посета на Македонија, по преземањето на оваа функција во јули 2017 година, пренесува Anadolu Agency (AA).

Како што информираат од Министерството за надворешни работи на Македонија, министерот Димитров се заблагодарил за соработката и поддршката од ОБСЕ, како и за можноста да се обрати пред Постојаниот совет на ОБСЕ кога подетално беше образложено спроведувањето на реформската агенда на Владата на Република Македонија, новата политичка клима во земјата и приоритети за идно дејствување.

„Воедно го информираше соговорникот за актуелните и идните активностите на Владата, со посебен акцент на Акцискиот план 3-6-9, кој влегува во втора фаза на имплементација. Притоа Министерот ги изложи приоритетните области во кои се насочени напорите за дејствување и подобрување на состојбите, и тоа: владеење на правото и судството, човековите права и слободата на медиумите, како и изборното законодавство, каде препораките и поддршката од ОБСЕ се добредојдени", се вели во соопштението.

Од своја страна, генералниот секретар Гремингер, изразувајќи задоволство од текот на посетата, издвои две пораки: упатување на пофалба за надминување на политичката криза, како и изразување на поддршка од ОБСЕ за реформската агенда на Владата, информираат од Министерството за надворешни работи на Македонија.

„Притоа, нагласи дека иако ОБСЕ е организација која генерално има мандат за менаџирање на предизвици, во актуелниот македонски контекст е подготвена да разгледува начини за искористување на поволни прилики и зграпчување на позитивниот момент за демократскиот развој на државата. Акцентирајќи го задоволството од изнесениот позитивен наратив, ветувачкиот реформски пат и визија за иднината, Генералниот секретар Гремингер изрази охрабрување."

Во понатамошниот тек на разговорите соговорниците се осврнаа на конкретните области и начините со кои ОБСЕ може да даде свој придонес и поддршка на демократските реформски процеси, како и на идната соработка и активности во рамките на ОБСЕ.