Грчкиот суд наложи апсење и затворање на челниците на злосторничката организација „Златна зора“

АТИНА

Грчкиот суд наложи апсење и испраќање во затвор на Никос Михалоиакос, лидерот на екстремно десничарската злосторничка организација „Златна зора“ и останатите раководители, кои се осудени на по 13 години затвор, јавува Агенција Анадолија (АА).

Апелациониот суд во Атина го отфрли барањето за „суспензија на затворските казни“ за лидерот на партијата, Михалолијакос и раководителите Илиас Касидиарис, Јианис Лагос, Ѓоргос Ѓерменис, Илијас Панагиотарос, Панагиотис Илиополус и Никос Папас.

Со одлуката на Судот, вкупно 39 члена на „Златна зора“ ќе одат во затвор, од кои 7 се прогласени за виновни „за водење на злосторничка организација“. Казните за останатите 12 од вкупно 51 обвинет на кои се судеше во рамките на предметот се одложени.

Грчките медиуми наведуваат дека членовите на „Златна зора“, чие апсење е наложено, започнале самоиницијативно да се предаваат на полицијата.

- За убиецот на пејачот Павлос Фисас доживотен затвор

Членот на партијата, Јорго Рупакијас, е осуден на доживотен затвор за убиството на левичарскиот пејач Павлос Фисас.

Судската постапка против „Златна зора“, откако е обвинета за дејствување како криминална организација, беше започната откако приврзаникот на таа политичка партија, Јоргос Рупакијас, во 2013 година го уби пејачот Павлос Фисас, кој беше познат по своите левичарски ставови.

По истрагата, поднесена е тужба против Михалолијакос, лидерот на „Златна зора“, и против уште 68 лица, меѓу кои и пратеници на оваа партија, под обвинение „за водење вооружена криминална организација и за членување во неа“.

Судската постапка, која траеше повеќе од пет години пред Апелациониот суд во Атина, заврши на 7 октомври, така што по дури 454 рочишта е утврдено дека екстремно десничарската партија „Златна зора“ дејствувала како криминална организација. Откако Судот го објави времетраењето на затворските казни, се очекува оние што се прогласени за виновни да бидат уапсени и испратени во затвор.

- „Златна зора“ беше трета партија по големина

Партијата „Златна зора“, основана во 1980 година од Николаос Михалолијакос, познат по своите расистички и неонацистички ставови, беше трета партија по големина во Парламентот за време на должничката криза во Грција, а на изборите во 2012 година првпат влезе во Парламентот освојувајќи 18 од вкупно 300 места.

Оваа екстремно десничарска партија на изборите во 2015 година освои три пратенички места во Европскиот парламент, но на последните избори во 2019 година не успеа да влезе во Парламентот бидејќи не го помина изборниот праг од 3 отсто.