Вселенската патријаршија ја призна Охридската архиепископија за канонска

СКОПЈЕ (АА) - Светиот Синод на Вселенската патријаршија на своето заседание под претседателство на патријархот Вартоломеј донесе одлука со која ја признава Охридската архиепископија за канонска, пренесува Агенција Анадолија (АА).

Информацијата преку официјално соопштение ја соопшти Канцеларијата на Светиот Синод на Вселенсĸата патријаршија.

„Светиот и Свештен Синод, ĸој заседаваше понеделниĸ, 9 мај 2022 година, под претседателство на Неговата Божествена Сесветост, Вселенсĸиот Патријарх г. г. Вартоломеј, исцрпно дисĸутираше за црĸовниот проблем во Сĸопје и, оценувајќи го во ĸонечна фаза апелацисĸото прибегнување (еĸлитон) на тамошната Црĸва до Мајĸата Црĸва, ĸаĸо и повторените повици од државата Северна Маĸедонија, го одлучи следново: Ја прима во евхаристисĸо општење јерархијата, ĸлирот и народот на оваа Црĸва под Архиеписĸопот г. Стефан“, се наведува во соопштението.

Каĸо име на црквата го признава „Охридсĸа“ (имајќи го на ум ĸаĸо област на нејзината јурисдиĸција владението во границите на државата Северна Маĸедонија).

Оваа одлука не значи томос за автокефалност со кој официјално се регулира меѓународното име и статус на Македонската православна црква (МПЦ), туку претставува објава дека црквата повеќе не е во раскол со православниот свет.

Томос за автокефалност, според процедурите, може да донесе само Вселенската патријаршија.

Во соопштението се додава дека се остава на Црĸвата на Србија да ги уреди управните прашања што ги има помеѓу неа и Црĸвата во Северна Маĸедонија, во контекст на „светиот канонски поредок и црковната традиција“.

- Честитки од Пендаровски и Ковачевски -

По повод признавањето на Охридската архиепископија од страна на Вселенската патријаршија, честитки до поглаварот на Македонската православна црква - Охридска архиепископија (МПЦ - ОА), г.г. Стефан, упати претседателот на Северна Македонија Стево Пендаровски.

„Со оваа важна одлука се исправа долгата историска неправда нанесена врз нашата Црква и нејзините верници и се исцелуваат длабоките рани поради децениите изолација со кои се соочи возобновената Охридска архиепископија. Примајќи ја нашата Црква во евхаристиско општење, Вселенската патријаршија ги избриша вештачки создадените поделби и го отвори просторот за градење на духовно единство на православните верници“, се вели во честитката.

Во честитката објавена на неговиот официјален профил на социјалните мрежи, премиерот Димитар Ковачевски, помеѓу другото напиша:

„Иако со овој чин конечниот статус и име сѐ уште не се решени, најважниот и најголем чекор е завршен. Сега нашата православна црква е во заедница со сите православни цркви, и овој ден е историски ден после 7 децении тотална изолација. Денеска со одлуката на Вселенската патријаршија ние влегуваме во православното семејство на сите помесни цркви. И оваа одлука на Вселенската патријаршија што нè признава под име Охридска архиепископија значи признавање на континуитетот што го има нашата историска црква со древната Охридска архиепископија.“