Во Скопје се одржа конференцијата „Значењето на пописите на населението за Бошњаците во Македонија и регионот“

СКОПЈЕ (АА) – Во организација на Координативното тело на бошњачките организации за Попис 2021 денеска во Скопје се одржа конференција на тема „Значењето на пописите на населението за Бошњаците во Македонија и регионот“, јавува Агенција Анадолија (АА).

На конференцијата свое обраќање имаа Зеќир Рамчиловиќ, пратеник во Собранието на Северна Македонија, Дуда Баље, пратеничка од редот на Бошњаците во Собранието на Косово, Скендер Кандич, советник на заменичката на премиерот на Косово, Емилија Реџепи, заменик - директорот на Агенцијата за остварување на правата на заедниците (АОПЗ), Џелал Хоџиќ, универзитетски професори, претставници на бошњачки невладини организации и други гости.

Пратеникот Зеќир Рамчиловиќ упати апел до сите граѓани на Северна Македонија да се вклучат активно во пописот на населението со оглед на тоа што во Северна Македонија подолг период од 19 години немаше попис за да се планира стратегијата за јавните политики.

„Сите оние што повикуваат на јавен или на прикриен бојкот нека си ја преземат одговорноста и нека застанат на вистинската страна повикувајќи ги граѓаните да се вклучат во овој процес“, рече Рамчиловиќ.

Рамчиловиќ, исто така, упати апел до сите граѓани на Северна Македонија што живеат во дијаспората да ја искористат интернет алатката и да се попишат.

Пратеничката од редот на Бошњаците во Собранието на Косово, Дуда Баље, гостинка на денешната конференција, рече дека пописот е значаен и за целата држава и за малцинствата кои живеат во земјата.

„Сметам дека пописот на населението е еден од моментите кога луѓето се третираат математички, односно во бројки, но и еден од најважните моменти со оглед на тоа што пописот се реализира на секои десет години“, рече пратеничката Баље.

Баље упати апел до сите Бошњаци во Северна Македонија да се почитуваат себеси, да го почитуваат своето семејство, својата заедница, својата држава и да покажат тоа што се бидејќи тоа е многу значајно.

Скендер Кандич, советник на заменичката на премиерот на Косово, Емилија Реџепи, во изјавата за медиумите пред почетокот на конференцијата рече дека ги пренесува поздравите на заменичката на премиерот, која не можела да дојде поради обврските во косовската Влада.

Осврнувајќи се на значењето на пописите на населението за Бошњаците во Македонија и регионот, Скендер Кандич, рече дека секој попис е многу важен за населението, посебно за бошњачката заедница во Северна Македонија.

„Знам дека на последниот попис имаше 17.000 Бошњаци и дека 13.000 лица беа неодредени. Тоа се изгубени 13.000 многу значајни луѓе. Тоа е статистички податок кој е многу важен во секој поглед“, нагласи советникот Кандич, додавајќи дека пописот е значаен особено за зачувување на идентитетот, културата и образованието.

Истакнувајќи дека овој попис е многу значаен за Бошњаците во Северна Македонија, Џелал Хоџиќ, директорот на Агенцијата за остварување на правата на заедниците (АОПЗ), рече дека Бошњаците ја чувствуваат Северна Македонија како своја држава и дека ја делат судбината со останатите етнички заедници.

„Од друга страна пописот е важен затоа што бошњачката заедница едвај чека да дојдат резултатите врз кои утре ќе градиме политики на среден и на долг рок од образованието, преку културата, инфраструктурата, употребата на јазици и така натаму“, рече Хоџиќ.

Конференцијата се одржа во пресрет на најавениот Попис на населението во РСМ, кој треба да се одржи од 1 до 21 април.

Бошњачките невладини организации започнаа кампања за пописот насловена „Битно е да се биде Бошњак“ (Bitno je biti Bošnjak).

Кампањата има за цел да се информира бошњачката јавност за пописот и да се повикаат Бошњаците да се попишат.

Според пописот од 2002 година, како Бошњаци се изјасниле 17.018 граѓани на Македонија според етничката припадност, односно 0,84% од вкупниот број на граѓани.