Албанија со реакција по повод наводите на Грција за проширувањето на поморските територии на Јонското Море

ТИРАНА

Албанија реагира во врска со наводите на Грција дека планира да ги прошири поморските територии на Јонското Море од 6 на 12 милји, пренесува Агенција Анадолија (АА).

Премиерот на Албанија, Еди Рама, на социјалните мрежи реагираше за ова прашање, давајќи одговор за критиките упатени на социјалните мрежи и медиумите во земјата во врска со тоа.

„Вистината е едноставна. Поморската граница не е како ограда меѓу две куќи, и кога грчките власти велат дека ќе се прошират од 6 на 12 милји, тоа не подразбира дека Грција ќе ги проголта територијалните води на Албанија, туку обично соседната земја го остварува правото што произлегува од Конвенцијата за законот на морето, усвоена во 1982 година во Монтего Беј. Инаку, Албанија го направи истото проширување во остварувањето на истото право, и за тоа ги извести Обединетите нации (ОН) во март 1990 година, нешто што никогаш не го оспорија нашите соседи и останува во сила денес и засекогаш“, рече Рама.

Албанскиот премиер нагласи: „Ова наше право не е некое прашање за преговарање и преговорите за разграничување на поморските простори никако не го нарушуваат ова право. Ниту за Албанија, ниту за Грција.“

Според него, причината зошто поттикнувачите на ставот кој е против договор со Грција, не го сакаат договорот, нема ниту една поврзаност со вистината на договорот, додека, рече тој, тоа е само причина за војување за власт.

Во врска со ова прашање реагираше и овластениот министер за надворешни работи на Албанија, Гент Цакај, кој на социјалните мрежи нагласи дека Министерството за Европа и надворешни работи на Албанија внимателно ги следело случувањата во грчкиот Парламент и изјавите на високите претставници на соседната земја.

„Владата на Албанија го оценува постигнувањето на договорот за разграничување на поморските простори меѓу земјите од регионот на Медитеранот, потпирајќи се на меѓународните норми за поморските права и духот на пријателството и меѓусебениот интерес“, рече Цакај.

Тој нагласи дека Владата на Албанија ќе биде внимателна за секој законодавен процес во соседната земја, што според него може да има влијание во спроведувањето на територијалната сувереност и суверените права на поморскиот простор.

Инаку, грчкиот премиер Кирјакос Мицотакис, за време на седницата на грчкиот Парламент нагласи дека планираат да ги прошират територијалните води на Јонското Море од 6 на 12 милји.