„Косово нема план Б за членство во ЕУ“, изјави премиерот Курти

ПРИШТИНА (AA) – Вршителот на должноста премиер на Косово, Албин Курти, изјави дека Косово нема план Б за својот пат кон членството во Европската Унија, пренесува Анадолу.

Курти, кој е поканет во Брисел од Центарот за европски политички студии (CEPS) да говори на тема „Патот на Косово кон ЕУ: напредна демократија, безбедност и економски раст“, рече дека проширувањето на ЕУ треба да биде стратегиско, реално и базирано врз заслуги.

Тој рече дека оние што се усогласени со Заедничката надворешна и безбедносна политика на ЕУ (CFSP) и ги поддржуваат вредностите на ЕУ потребно е одново да се преиспитаат, а не да бидат оставени под рестриктивни мерки.

„Доаѓа време Косово и ЕУ да ги интензивираат заедничките напори за надминување на пречките во процесот на зачленување на Косово во ЕУ. Имено, да се иницира прашалник за Косово, со кој ќе се проценат нашите институционални и правни капацитети за членство во ЕУ и да се подготви мислење базирано врз заслуги за статусот кандидат“, нагласи Курти.

Според Курти, Косово покажало дека е доверлив партнер на ЕУ и силно верува во својата европска иднина.

„Време е ЕУ да покаже дека го гледа Косово како дел од својата иднина. Тоа дополнително ќе ја зајакне нашата посветеност кон европската агенда и ќе го направи патот кон ЕУ пореален“, додаде Курти.

Тој рече дека кандидатскиот статус на Косово за членство во Европската Унија е задоцнет.