„Во Македонија има околу 100 деца со нарушувања на растот"

СКОПЈЕ (АА) - Светскиот ден за подигнување на свеста за растот на децата - 20 Септември, годинава се одбележа под мотото „Децата имаат само кратко време да пораснат, да им помогнеме да растат здраво, затоа што висината е еднаква на здравјетo“, јавува Anadolu Agency (AA).

На интернационалниот Светски ден за подигнување на свеста за растот на децата, најзначајната порака беше испратена до родителите и старателите.

„Доколку висината кај вашето дете не одговара на возраста и на полот, разговарајте со лекарот дали има потреба да консултирате педијатар ендокринолог“, беше подвлечено во пораката.

Претседателот на Здружението „РАСТ“, Александар Петровски, истакна дека светското искуство говори дека децата со нарушување на растот се соочуваат со сериозни проблеми, а тоа е доцната дијагноза и ненавременото лекување.

„Ненавременото лекување на ова заболување доведува до сериозни последици кои не се само проблем на детето и семејството, туку и проблем на системот“, рече Петровски, осврнувајќи се на тоа дека секој мора на ум да го има тоа дека нарушувањето на растот многу често е најраниот сипмтом кој ни открива многу други заболувања кои стојат во позадина како причина.

Петровски, исто така, се осврна и на барањата од Владата и од здраствените институции.

„Изготвување национален регистар на пациенти со нарушување на растот. Со точна евиденција на реалниот број на пациенти. Изнаоѓање начин за набавка, кој нема повеќе да зависи од тендерски постапки, и терапија за сите деца што имаат потреба од лекување.“

Директорот на Фондот за здравстено осигурување на Република Македонија (ФЗОМ), Ден Дончев, истакна дека како релативно нов директор се соочил со фактот дека барањата во здравството се големи.

„За жал ресурсите со кои располагаме се тие што се, односно лимитирани. Но, тоа не е само предизвик за Фондот за здравство, за нашето општество. Тоа, секако, е предизвик за секое општество каде што секогаш средствата, ресурсите, на еден начин се лимитирани“, рече Дончев.

„Цело е кога има сè“ подвлече директорката на ЈЗУ Универзитетска детска клиника, д-р Катерина Ставриќ, потврдувајќи дека клиниката во потполност ги подржува активностите на здружението „РАСТ“.

„Клиниката во поглед на дијагностиката и третманот на пациентите се труди максимално да ја обезбеди терапијата. Излеговме во пресрет, последната година се обезбеди децата да ја примаат терапијата на 3 месеци, со што се намалија и трошоците и губењето време на родителите“, истакна директорката Ставриќ.

Инаку, според податоците на Здружението „РАСТ“, во Македонија во моментов има околу 100 деца со нарушувања на растот кои се лекуваат со хормон за раст.