Во Македонија 100 до 110 деца се лекуваат со хормон за раст

СКОПЈЕ (АА) - Под мотото „Децата имаат кратко време да растат, а цел живот да живеат со резултатите“, Здружението на родители на децата со ендокринолошки заболувања – „Раст“, денеска се придружи на глобалната инцијатива за одбележување на 20 Септември, Светскиот ден за подигнување на свесноста за растот кај децата, каде што на прес-конференција информираше за состојбата на лицата со ендокринолошки заболувања, јавува Anadolu Agency (AA).

Претседателот на Здружението на родители на децата со ендокринолошки заболувања – „Раст“, Александар Петровски, во своето излагање истакна дека навременото поставување дијагноза кај децата со нарушен раст и соодветно отпочнување со неопходната терапија во раните години од претшколска возраст, овозможува да се постигнат добри резултати во нивното лекување.

Тој информираше дека во Македонија, 100 до 110 деца со нарушување на растот се лекуваат со хормон за раст, терапија којашто е целосно покриена од државата, но постои поголема група деца кои сѐ уште не добиле можност да почнат со терапијата.

„Континуирано се ангажираме заедно со институциите да се изнајде решение за можност новите пациенти да добијат навремена терапија и право на избор на терапија, како што е воспоставено во најголем број земји во светот, затоа што 365 дена во годината мора без прекин да ја примаме терапијата со хормон за раст“, рече Петровски.

Директорот на Фондот за здравствено осигурување на Македонија (ФЗОМ), Сашо Стефаноски, кој беше еден од говорниците на прес-конференцијата рече дека Фондот го зголемил буџетот и обезбедил условен буџет за целно лекување на Детската клиника, и петта година по ред децата добиваат навремена терапија за здрав и нормален развој.

Стефановски истакна дека годинава предвиделе средства во висина од 51.068.400 денари за хормон за раст на 100 деца.

„Нашата соработка со „Раст“ резултираше и со подобрување на начинот на кој децата ја земаат потребната терапија. Тоа значи дека сега родителите на 100 дечиња кои имаат потреба од хормонот за раст доаѓаат во здравствените установи еднаш на три месеци и ја подигнуваат терапијата. Заштедивме време и пари на родителите, кои сега доаѓаат на Детската клиника само петпати годишно, наместо како порано, 24 пати во годината“, рече Стефаноски.

Директорката на Клиниката за детски болести, Аспазија Софијанова зборуваше за важноста на одбележувањето на Светскиот ден за подигање на свеста за растот кај децата и во Македонија, и рече дека меѓу другото, треба да се работи и со семејствата на децата што имаат проблем со растот со цел превентивно и поефективно делување во однос на справувањето со сите здравствени предизвици.

„Почнавме уште пред неколку години и супер одиме особено во делот на оние што досега го примале хормонот за раст и веќе достигнале висина којашто е поврзана со насмевка, задоволство и квалитетен живот. Нашата крајна цел е да работиме повеќе и со семејствата кои го имаат тој проблем, и тоа ќе продолжи“, рече Софијанова.

Исто така, на настанот се обрати и директорот на Детската болница Козле, Оливер Зафировски. Тој рече дека институцијата што тој ја предводи дава придонес во раната детекција и секогаш, на секое дете што ќе дојде кај нив, за кое било белодробно лекување му прават и процена на растот.

„По соодветните направени испитувања и процената на растот, ако имаме индикации дека не задоволува за возраста, наша единствена цел е да ги упатиме на Клиниката за детски болести каде што има професионалци кои работат на таа област и да продолжат со нивното лекување“, рече Зафировски.

Во рамки на одбележувањето на Светскиот ден за подигнување на свеста за растот кај децата, на плоштадот „Македонија“ денеска се организира бесплатно мерење на висината и тежината на сите дечиња кои сакаат да проверат дали нивната висина е соодветна за возраста.