ИСТАНБУЛ (АА) – Финска работи на развој на мобилна апликација за предупредување на граѓаните за приближување на дронови, објави денес финскиот јавен сервис ЈЛЕ, повикувајќи се на Министерството за внатрешни работи, пренесува Анадолу.

Апликацијата, која е дел од поширок систем за рано предупредување, се очекува да биде подготвена до крајот на 2027 година.

Паралелно со неа се развива и систем за известување преку СМС-пораки.

Сепак, директорот за подготвеност во Одделот за спасување при Министерството за внатрешни работи, Јуси Корхонен, појасни дека двата система имаат „малку различни цели“.

Системот со СМС-пораки ќе овозможи известување и за лица што не користат паметни телефони и ќе може да се користи за различни видови опасност.

„Мобилната апликација е наменета првенствено за вонредни ситуации потврдени од Владата или претседателот, како што се вооружени напади или закани за Финска“, додаде Корхонен.

Апликацијата ќе биде интегрирана во постојната платформа „112 Suomi.fi“, која веќе обезбедува известувања за опасности.

Претходно финското Министерство за одбрана соопшти дека најмалку две беспилотни летала биле детектирани во југоисточниот дел на земјата, при што едно од нив било идентификувано од финското воздухопловство како украинско, пред да се урне во близина на градот Куовола.

За идентификација на објектите биле ангажирани фински борбени авиони Ф/А-18, но тие не интервенирале за да се избегне евентуална колатерална штета.

Југоисточна Финска граничи со Русија, која е вклучена во вооружен конфликт со Украина од февруари 2022 година.