СКОПЈЕ (АА) - Средношколци и демонстранти го блокираа средното училиште „Морис Равел“ во Париз како дел од националниот штрајк свикан од синдикатите, јавува Анадолу.

Подоцна групата маршираше по трамвајските шини Т3б, скандирајќи ЗА поддршка на Палестина, придружувајќи им се на барањата на локалните синдикати со пораки за меѓународна солидарност.

Националниот штрајк и протести предводени од синдикатите започнаа низ цела Франција рано утринава, при што досега се приведени 30 лица.

Француската национална полиција соопшти дека во првите часови од мобилизацијата биле забележани 40 блокади, а медиумот БФМ ТВ јави за 30 приведени лица.

Министерот за внатрешни работи во заминување, Бруно Ретајо, информираше дека имало обиди за блокади низ Париз, како и обид за саботажа на водоводната мрежа во Мартиник.

Протестни собири се одржуваат и во Вар, Каен, Финестер и Тулон.

Штрајкови беа организирани и во училиштата – средното училиште во Париз беше блокирано од учениците, а околу 33% од наставниците во основните училишта им се придружија на протестите.

Мобилизацијата, организирана од најголемите француски синдикати, е одговор на контроверзните буџетски предлози што ги претстави поранешниот премиер Франсоа Бајру.

Претходно Ретајо изјави дека очекува „многу, многу силна“ мобилизација во повеќе сектори – јавни услуги, образование, транспорт, земјоделство, индустрија и култура.

Министерството за внатрешни работи најави распоредување на повеќе од 80.000 полицајци и жандарми низ земјата, како и употреба на оклопни возила, дронови и водени топови.

Во потег што не е виден од протестите на „Жолтите елеци“, 24 оклопни возила „Кентаур“ ќе бидат распоредени низ цела Франција, заедно со десетина водени топови.

Планирани се околу 40 синдикални маршеви низ Франција, а првичните процени покажуваат дека ќе учествуваат до 800.000 демонстранти.

Акцијата на 18 септември следува по мобилизацијата „Блокирај сè“ од минатата недела, на која учествуваа речиси 197.000 луѓе на национално ниво.

- Контроверзниот национален буџет

Франција се соочува со зголемени политички тензии откако на 8 септември на Бајру не му беше изгласана доверба во Националното собрание.

Тој во јули го претстави буџетскиот план за 2026 година, со цел да заштедат речиси 44 милијарди евра (51 милијарда долари) за намалување на јавниот долг, кој достигна 113% од БДП на земјата.

Францускиот претседател Емануел Макрон го назначи министерот за вооружени сили Себастијен Лекорни за нов премиер, задолжувајќи го да започне консултации со политичките партии пред формирањето на новата влада.

Франција има еден од најголемите буџетски дефицити во ЕУ – 5,8% од БДП.

Минатогодишниот неуспех да се постигне договор за буџетот за 2025 година доведе до пад на Владата на Мишел Барние во декември откако левичарските и крајно десничарските партии се обединија зад предлогот за недоверба.