ГРАД ГАЗА/ИСТАНБУЛ (АА) – Во израелските напади врз Појасот Газа во изминатите два дена убиени се повеќе од 90 Палестинци и покрај меѓународните повици за прекин на огнот, соопштија локалните власти, јавува Анадолу.

Израелските сили извршија 131 воздушен и артилериски напад врз густо населени области со цивили и раселени лица во Газа, во кои животот го загубија 94 цивили, меѓу кои и жени и деца, од кои 61 од жртвите се во градот Газа, соопшти Канцеларијата за медиуми на Владата на Газа преку Телеграм.

„Ова тековно злосторство спаѓа во рамките на континуираниот геноцид врз нашиот палестински народ и потврдува дека окупацијата ги игнорира сите меѓународни повици за деескалација, инсистирајќи на продолжување на систематското убивање на цивили и уништување на средствата за живот во Појасот Газа“, се вели во соопштението.

Се повикуваат американската администрација и меѓународната заедница да преземат „сериозни, ефикасни и итни мерки“ за да ја запрат агресијата и да обезбедат прекин на огнот.

Во саботата Кабинетот на израелскиот премиер Бенјамин Нетанјаху соопшти дека тој е подготвен да ја спроведе првата фаза од планот на американскиот претседател Доналд Трамп за Газа, повикувајќи на итно ослободување на сите израелски заробеници.

Извештаите на израелската војска и медиумите тврдеа дека политичкото раководство наредило прекин на окупацијата на градот Газа и „намалување на воените активности во Појасот (Газа) само на одбранбени операции“.

На 29 септември Трамп претстави план за Газа од 20 точки, кој вклучува ослободување на израелските заробеници во рок од 72 часа од одобрувањето од страна на Израел, прекин на огнот и разоружување на палестинската група Хамас.

Тел Авив проценува дека во Газа се држат 48 израелски заробеници, од кои 20 живи. Во меѓувреме, Израел држи околу 11.100 палестински заробеници, од кои многумина се соочуваат со тортура, глад и медицинско занемарување, според палестинските и израелските групи за човекови права.

Од октомври 2023 година во израелските бомбардирања убиени се повеќе од 67.000 Палестинци во Газа, а најголем дел од нејзината инфраструктура е во урнатини.