ИСЛАМАБАД (АА) - Граничните судири меѓу Пакистан и Авганистан продолжија и денес, јавува Анадолу.

Најновите судири се случиле покрај границата во областа Спин Болдак во Авганистан, во јужната покраина Кандахар, која граничи со југозападната покраина Белуџистан во Пакистан.

Пакистанската Армија, во официјално соопштение, тврди дека авганистанските талибанци започнале напад пред зори на четири локации во Белуџистан.

Во соопштението се тврди дека осум авганистански пунктови и шест тенкови „биле уништени“, додека „се сомнева дека се убиени 25-30 авганистански талибанци и борци на Фитна ал-Хвариџ (Техрик-е-Талибан Пакистан)“.

Сепак, Забиула Муџахид, главниот портпарол на авганистанската привремена администрација, изјави дека 12 Авганистанци биле убиени, а над 100 други повредени за време на судирите.

Тој тврдеше дека авганистанската страна наводно запленила тенк од пакистанската страна во контранапад.

Сепак, пакистански безбедносен претставник негираше дека авганистанските сили заробиле тенк.

Официјалиот претставник додаде дека авганистанските талибанци бараат прекин на огнот по „силниот одговор“ од Пакистан.

Пакистански безбедносни извори, исто така, тврдеа дека „елиминирале неколку терористи“ и дека е запленето оружје произведено во САД во секторот Курам во северозападната покраина Хајбер-Пахтунхва во Пакистан.