РАМАЛА (АА) – Нелегални израелски доселеници денес нападнаа палестински овчар и му го украдоа стадото од 300 овци на окупираниот Западен Брег, соопштија локални жители, јавува Анадолу.

Инцидентот се случил во селото Кафр Малик, источно од Рамала. Палестинецот Халед Гара е претепан додека ги пасел овците, по што е пренесен во болница со модринки и други повреди.

Напаѓачите потоа, пред да го напуштат местото, го украле целото негово стадо.

Нападите на израелските доселеници врз палестинските земјоделци и овчари се сè почести низ целиот Западен Брег, со цел да се изврши притисок врз заедниците да ги напуштат своите поседи.

Според Палестинската комисија против Sидот и населбите во јули се регистрирани 1.201 напади од израелските сили и доселениците, од кои 466 биле директни напади од доселеници.

Откако Израел ја започна офанзивата врз Појасот Газа во октомври 2023 година, најмалку 1.016 Палестинци се убиени, а над 7.000 се повредени на окупираниот Западен Брег од израелските сили и доселениците, соопшти палестинското Министерство за здравство.

Меѓународниот суд на правдата во јули минатата година ја прогласи израелската окупација на палестинските територии за незаконска и побара евакуација на сите израелски населби на Западниот Брег и Источен Ерусалим.