ИСТАНБУЛ (АА) - Франција ќе изгради нов носач на авиони за морнарицата на земјата, објави денес претседателот Емануел Макрон, јавува Анадолу.

„Мора да бидеме силни за да стравуваат од нас, а особено силни на море. Затоа, во согласност со последните два закони за воено програмирање и по целосно и темелно разгледување, решив да ја опремам Франција со нов носач на авиони“, рече Макрон денес во обраќањето пред француските војници во воената база во Абу Даби.

Тој истакна дека одлуката за започнување на програмата „од големи размери“ е донесена оваа недела.

Новиот носач на авиони на Француската морнарица е наменет да го замени сегашниот носач на авиони „Шарл де Гол“ кон крајот на 2030-тите, според јавниот сервис БФМТВ.

„Овој нов носач на авиони ќе биде илустрација на моќта на нашата нација, моќта на индустријата и технологијата, моќта ставена во служба на слободата во морињата во услови на превирањата во наше време“, додаде Макрон.

Францускиот претседател пристигна во Обединетите Арапски Емирати денес за да го помине Божиќ со француските војници и за разговори со земјата од Персискиот Залив за билатералните односи.