БРИСЕЛ (АА) – Европската Унија (ЕУ) цврсто ги поддржува Гренланд и Данска во одбраната на нивниот територијален интегритет, изјави денес шефицата за надворешна политика на ЕУ, Каја Калас, нагласувајќи дека суверенитетот не може да се третира како адут за преговарање, јавува Анадолу.

„Гренланд му припаѓа на неговиот народ. Ниту една закана или царини нема да го сменат тоа. За суверенитетот не се тргува“, изјави Калас пред Европскиот парламент за време на пленарната дебата за неодамнешните потези на САД во врска со Гренланд, додавајќи дека одговорот на ЕУ мора да остане смирен, обединет и заснован врз меѓународното право.

Калас нагласи дека ниедна земја нема право да ја преземе територијата на друга земја. „Ниту во Украина ниту на Гренланд, никаде во светот“, рече таа, нагласувајќи ја посветеноста на ЕУ на меѓународен поредок базиран врз правила.

Таа истакна дека разговорите за иднината на Гренланд се водат директно меѓу Данска и Гренланд и дека надворешните притисоци или закани се контрапродуктивни.

„Тие само ризикуваат да ги направат и Европа и САД посиромашни и да го поткопаат нашиот заеднички просперитет“, рече таа, осврнувајќи се на неодамнешните закани со царини од страна на американскиот претседател Доналд Трамп.

„Немаме интерес да започнуваме борба, но ќе се држиме до своите позиции. Европа има низа алатки за да ги заштити своите интереси“, додаде таа.

Арктикот се појавува како ново место на геостратешка конкуренција. Како што се топи арктичкиот мраз, предупреди Калас, постои растечки ризик Русија и Кина да го прошират своето присуство во регионот.

„Доколку има загриженост за безбедноста на Гренланд, НАТО е способен да ги реши“, рече таа, истакнувајќи дека во текот на изминатата недела неколку европски земји испратија воен персонал на извидувачка мисија на Гренланд.

„Ова присуство има цел да го одржи регионот безбеден, предвидлив и стабилен, тоа не претставува закана за никого. Бидејќи одбраната и заштитата на Гренланд се заедничка грижа за Европа и целиот НАТО сојуз“, додаде таа.

Во саботата Трамп рече дека Вашингтон ќе воведе 10% царини за стоки од Данска, Норвешка, Шведска, Франција, Германија, Велика Британија, Холандија и Финска од 1 февруари, зголемувајќи ги на 25% во јуни додека не се постигне договор за „целосно купување на Гренланд“.

Како одговор на тоа, европските лидери ги отфрлија заканите на Трамп за царини против осумте европски земји и ја повторија солидарноста со Данска.