ВАШИНГТОН (АА) - Американскиот конгресмен Шон Кастен вчера претстави предлог-закон со кој се предвидува забрана за употреба на оружје со американско потекло во Газа и на Западниот Брег доколку Израел го прекрши прекинот на огнот од 10 октомври 2025 година, продолжи со анексија или не преземе мерки против насилството на израелските доселеници врз Палестинците, јавува Анадолу.

Кастен изјави дека Законот за почитување на прекинот на огнот има за цел да ја усогласи американската воена помош со законите, интересите и вредностите на САД, истовремено зачувувајќи го правото на Израел на самоодбрана.

„Како еден од најважните сојузници на САД, Израел мора да обезбеди неговите политики и користењето на американската воена помош да бидат во согласност со американските вредности, интереси и закони“, се наведува во изјавата.

„Тоа започнува со барање за почитување на договорот за прекин на огнот од 10 октомври 2025 година и чекорите утврдени во планот од 20 точки, ограничување на насилството на доселениците и отфрлање на анексијата на Западниот Брег“, рече тој во изјавата.

Според предлог-законот, ќе биде формирана група за мониторинг на крајната употреба на оружјето, како и механизми за надзор од страна на Конгресот за спроведување на забраната. Исклучок ќе бидат одбранбените ракетни системи „Ајрон Дом“, „Дејвидс Слинг“ и „Ероу 3“, со што ќе се задржи американската поддршка за безбедноста на Израел.

Кастен нагласи дека законот „не му го одзема правото на Израел да се брани“, туку воспоставува „заштитни механизми“ со цел одржување на прекинот на огнот и зачувување на кредибилен пат кон долгорочен мир, вклучително и безбедност за Израелците и право на самоопределување за Палестинците.

Копредлагачи на законот се и конгресмените Меделин Дин, Вероника Ескобар, Крис Делузио, Бека Балинт, Џим Мекговерн, Џен Шаковски, Ро Кана, Џон Гараменди, Дон Бејер, Џил Токуда, Лојд Догет, Валери Фуши, Мајк Томпсон, Силвија Гарсија, Дорис Мацyи, Дерек Тран, Емили Рендал, Џаред Хафман, Марк Такано, Трој Картер, Чели Пингри, Бони Вотсон Колман, Марси Каптур, Бети Мекколум и Хоакин Кастро.