ИСТАНБУЛ (АА) – Бактериски сој сочуван 5.000 години, отпорен на 10 денешни антибиотици, е откриен во заледена пештера во Романија, објави „Евро њуз“, повикувајќи се на неодамнешна студија, пренесува Анадолу.

Новоидентификуваниот сој, наречен „Psychrobacter SC65A.3“, кој може да биде отпорен на повеќе денешни лекови, е пронајден во древниот мраз во пештерата Скаришоара, една од најголемите ледени пештери во Романија во планините Апусени.

Познато е дека бактериите преживуваат со милениуми во екстремни средини, како длабоки слоеви мраз, пермафрост, океани и леднички езера. Со текот на времето, тие се адаптираат за да опстојат во такви сурови услови.

Истражувачите открија дека овој сој на Psychrobacter, адаптиран на студ, е отпорен на 10 антибиотици во осум класи.

„Бактерискиот сој Psychrobacter SC65A.3 изолиран од ледената пештера Скаришоара, и покрај неговото древно потекло, покажува отпорност на повеќе познати антибиотици денес и носи над 100 гени поврзани со отпорноста“, вели Кристина Пуркареа, авторка на студијата и научник во Институтот за биологија во Букурешт при Романската академија.

Пештерата содржи подземен блок мраз стар околу 13.000 години и со димензии од 100.000 кубни метри, што се смета за најголемиот и најстар подземен блок на мраз.

Пуркареа рече дека проучувањето на микроби како SC65A.3 од древниот мраз им помага на научниците да разберат како отпорноста на антибиотици еволуирала природно долго пред да постојат модерните лекови.

Објавена во „Frontiers in Microbiology“, студијата ја истакнува важноста на истражувањето на микробите адаптирани на студ, особено затоа што замрзнатите живеалишта покриваат 20 % од површината на Земјата и напредокот на климатските промени.

Антимикробната отпорност веќе предизвикува милиони смртни случаи на светско ниво секоја година, од кои повеќе од 35.000 годишно во Европа, бројка што веројатно ќе се зголемува.