Балкан

Спасовски: „Холокаустот врз Ромите не смее да остане заборавен"

„Ова е еден од најголемите порази на човештвото во историјата и затоа холокаустот врз Ромите не смее да остане заборавен како што го нарекуваат - „заборавениот Холокауст“, истакна Спасовски

Admir Fazlagic   | 01.08.2020
Спасовски: „Холокаустот врз Ромите не смее да остане заборавен" ( Foto: Arhiva / Anadolu Agency )

СКОПЈЕ

Во Скопје вечерва се одржа комеморација по повод сеќавањето на жртвите од геноцидот над Ромите во рамки на Втората Светска Војна – 2 август, пренесува Агенција Анадолија (АА).

На вечерашниот настан одржан со поддршка на Владата на Северна Македонија, присуствуваше претседателот на Владата Оливер Спасовски.

„Со овој настан денеска, одбележуваме еден од најтрагичните настани и процеси во историјата на човештвото – Холокаустот што за време на Втората светска војна бил извршен врз Ромите и Синтите, како дел од најмрачната замисла за така нареченото „конечно решение“ на нацистичката и фашистичка закана врз слободниот свет во тој период. Ова е ден кога се сеќаваме дека меѓу 1933 и 1945 година, нацистите и нивните соработници убиле стотици илјади Роми – мажи, жени и деца – во деловите од Европа кои биле под фашистичка окупација", рече Спасовски.

Во своето обраќање тој рече дека „Ромите во Европа биле мета на прогон од страна на нацистите, а масовните убиства го достигнале врвот во периодот од 31 јули до 2 август 1944 година кога Германците ја почнале ликвидацијата во Аушвиц – Биркенау, кога само во овој камп на смртта биле убиени речиси 3.000 Роми."

„Ова е еден од најголемите порази на човештвото во историјата и затоа холокаустот врз Ромите не смее да остане заборавен како што го нарекуваат - „заборавениот Холокауст“. Затоа на овој ден им оддаваме почит и на сите активисти и истражувачи кои се дел од поширокото движење за правата на Ромите и се залагаат за признавање на овој геноцид", истакна Спасовски.

Според него, од огромно значење е што во 1982 година, германските власти официјално ги признаваат кривичните дела против Ромите во текот на Втората светска војна, а триесет години подоцна, канцеларката Ангела Меркел го отвора спомен обележјето посветено на геноцидот врз Ромите во Берлин.

Спасовски потсети дека на 8 април 2015 година, Европскиот парламент усвои резолуција со која 2 август е прогласен за Европски ден на сеќавањето за холокаустот врз Ромите, со цел чествување на жртвите од геноцидот врз Ромите од Втората светска војна.

„Непризнавањето на криминалот кој се случил тогаш, се одразува врз долгорочната дискриминација на ромското население во Европа. Соодветното признавање на третманот на Ромите во минатото е од суштинско значење не само за да се обезбеди правда и достоинство на оние кои умреле, туку и за соочување со анти-ромскиот говор и однесување, и негово трајно отстранување", потенцираше Спасовски.

На комеморација по повод сеќавањето на жртвите од геноцидот над Ромите во рамки на Втората Светска Војна, присуствуваа и министерот задолжен за имплементација на Стратегијата за Ромите, Музафер Бајрам и главниот извршен директор на Фондот на Холокаустот на Евреите од Македонија, Горан Садикарио.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.