Barış Seçkin
23 ئادار 2020•نوێکردنەوە: 23 ئادار 2020
رۆما - AA
لە ئیتالیا ٦٥١ کەسی دیکەی بەهۆی تووشبوونیان بە ڤايرۆسى كۆرۆناى نوێ گیانیان لەدەستدا، بەمەش ژمارەی ئەو کەسانەی بەهۆی تووشبوونیان بە ڤایرۆسەکە لەو وڵاتەدا گیانیان لەدەستداوە بەرزبوویەوە و گەیشتە پێنج هەزار ٤٧٦ كەس.
بەڕێوەبەرى بەرگريى شارستانى ئيتاليا، ئەنجيلۆ بۆرێللى لە كۆنگرەى رۆژنامەوانى رۆژانەيدا لە رۆماى پايتەخت، دوایين ئامارەكانى تووشبوون بە ڤايرۆسى كۆرۆناى نوێ بڵاوكردەوە.
بۆرێللى رايگەياند، ژمارەى حاڵەتەكانى تووشبوون بە ڤايرۆسى كۆرۆنا لە وڵاتەكەدا گەيشتووەتە ٤٦ هەزار و ٦٣٨ كەس و بەوانەى كە گيانيان لەدەستداوە و ئەوانەى چاكبوونەتەوە ژمارەكە ٥٩ هەزار و ١٣٨ كەسن.
سەبارەت بەوانە كە چاكبوونەوەتەوە بۆرێللى، ئاماژەى بەوەكرد كە دوێنى شەش هەزار و ٧٢ کەس چاكبوونەتەوە ئەمڕۆش ٩٥٢ كەسى ديكە، كۆى گشتى حەوت هەزار 24 كەس لە ڤايرۆسەكە چاكبوونەتەوە.
بۆرێللى، راشيگەياند، ژمارەى گيانلەدەستدان بە بەراورد بە دوێنێ ٦٥١ كەس زياديكردووە و كۆى گشتى پێنج هەزار و ٤٧٦ كەس گيانيان لەدەستداوە.
سەبارەت بە ژمارەى گيانلەدەستدان لەمڕۆ كە ١٤٢ حاڵەت لە چاو دوێنێ كەمترە كە بەرزترين ژمارەى گيان لەدەستدان تۆماركرابوو، بۆرێللى گوتى: "ئومێدەوارين ئامارەكانى ئەمڕۆ دەستپێكێك بێت بۆ داكشان."
ئەنجيلۆ بۆرێللى، ئەوەشى راگەياند كە ١٢ كارمەندى بەڕێوەبەڕايەتى بەرگريى شارستانى رۆما، تووشى ڤايرۆسى كۆرۆنا بوونە و گوتيشى "ئەو كەسانە تەندروستييان باشە و لە ماڵەوە بەردەوامن لەسەر كارەكانيان."
سەبارەت بە پشكنينى خۆى، بۆرێللى رايگەياند كە بە نەرێنى دەرچووە.
