هەولێر.. یەکەمین شەپۆلی بەفربارین

خەڵکی هەرێمی کوردستان لەگەڵ هاتنی وەرزی زستاندا چاوەڕوانی ئەو رۆژە دەکەن کە بەفر دەبارێت و ئەوانیش بەهۆی ئەو کەشوهەوا بەفرینەوە، دەستە دەستە دەڕۆنە سەر کێوەکان و لەوێ کۆمەڵێک یاری و تۆپە بەفرینە و سەرکێشی ئەنجام دەدەن.

بەرەبەیانی ئەمڕۆ یەکەمین شەپۆی بەفربارین لە چیای سەفین دەستی پێکرد و هاووڵاتییانی شاری هەولێر و دەوروبەری، بە جۆش و خرۆشەوە روویان لە بەرزایی چیاکە کرد و لەوێ کۆمەڵێک یاری و تۆپە بەفرینەیان کرد.

بەشێک لە هاووڵاتییان بە هۆی زۆری بەفرەوە توانییان بە ئۆتۆمبێلەکانییان هەندێک سەرکێشی ئەنجام بدەن و بەشێکی دیکەش لە خۆشی بارینی بەفرە دەستیان کردە بە هەڵپەڕین.

ئەگەرچی ئۆتۆمبێلەکانی شارەوانی خەریکی راماڵینی بەفری سەر شەقامەکە بوون، بەڵام بەهۆی هەبوونی تەم و مژێکی زۆرەوە رادەی بینین کەم ببوو.

چیای سەفین بە دووری 30 کیلۆمەتر دەکەوێتە رۆژهەڵاتی شاری هەولێر و دەڕوانێتە سەر قەزای شەقڵاوە، ئەو چیایە لە وەرزی زستاندا بە بەشێوەیەکی هەمیشەیی بەفری لێ دەمێنێتەوە و چەند جارێکیش خەڵک بەهۆی بەفربارینەوە گیرییان خواردووە و دواتر رزگاریان بووە.