نۆیەمین پێشانگای کتێب بە بەشداری ٢١ ناوەندی بڵاوکردنەوە لە دهۆک دەستی پێکرد
بەڕێوەبەرایەتی ڕاگەیاندن و چاپ و بڵاوکردنەوەی دهۆک، نۆیەمین خولی پێشانگای کتێبی لە شاری دهۆک کردەوە، کە تێیدا ٢١ کتێبخانە و دەزگای وەشاندن بەشدارن.
Dahuk
دهۆک - AA
لە دهۆک نۆیەمین پێشانگای کتێب بە بەشداری ٢١ ناوەندی بڵاوکردنەوە لە هۆڵی زانکۆی دهۆک دەستی پێکرد.
بەڕێوەبەری ڕاگەیاندن و چاپ و بڵاوکردنەوەی دهۆک، خەلیل عەبدولغەفور لە لێدوانێکدا بۆ ئاژانسی ئانادۆڵو ئاماژەی بەوە کرد، کە هەر لە ڕۆژی یەکەمی کردنەوەی پێشانگاکەوە، پێشوازییەکی گەرم لەلایەن خوێنەرانەوە لێکراوه و گوتی: "ئامانجمان لەم پێشانگایە برەودانی زیاترە بە کولتووری خوێندنەوە، بەتایبەت لە ناوەندەکانی خوێندندا، ئەم چالاکییانە دەبنە هۆی ئەوەی سەرچاوە زانستییەکان بگەنە دەستی قوتابیان و خوێنەران، تا ئاستی ڕۆشنبیرییان بەرزتر بێت و سوود لە نوێترین سەرچاوەکان وەربگرن".
نۆیەمین خولی پێشانگای کتێبی دهۆک، نزیکەی ٨ هەزار ناونیشانی جیاواز لە بوارە هەمەجۆرەکاندا لەخۆ دەگرێت.
سەبارەت بە خواستی خوێنەران، ڕەوان بادی کە وەک خاوەن کتێبخانەیەک لە دهۆک بەشدارە، ڕایگەیاند: "خوێنەران بایەخ بە هەموو بوارەکان دەدەن، بەڵام ئێستا خواستێکی زۆر لەسەر بابەتە ئەدەبی و ئاینییەکان هەیە. هەروەها لەم دواییانەدا کتێبەکانی بواری دەروونناسی (سایکۆلۆژی) بوونەتە جێی سەرنجی خەڵکی دهۆک، شانبەشانی بابەتەکانی گەشەپێدانی مرۆیی و مێژوویی کە هەمیشە خوێنەری تایبەتی خۆیان هەیە".
پێشانگاکە وەک ناوەندێکی گرنگی بەیەکگەیشتنی نووسەران و خوێنەران دەبینرێت و تا ٦ی شوباتی ٢٠٢٦ بەردەوام دەبێت و چاوهڕوان دهكرێت ژمارەیەکی بەرچاو لە خوێنهران سەردانی بکەن.
