"ھێشتا دوو ھەزار و ٨٦٧ ئێزدی لە دەستی داعشدا ماون و رزگارنەکراون"

ھەولێر ــ AA

بەڕێوەبەری نووسینگەی رزگارکردنی رفێندراوانی ژێردەستی داعش، حوسێن کۆرۆ رایگەیاند کە ژمارەی ئەو رفێندراوە ئێزدییانەی کە تا ئێستا لە دەستی رێکخراوی تیرۆریستیی داعش رزگارکراون، گەیشتووەتە شەش ھەزار و ٤١٧ کەس.

حوسێن کۆرۆ لە لێدوانێکی رۆژنامەوانییدا دوایین ئاماری لەبارەی رفێنردراون و رزگارکراوانی ئێزدی لە دەستی رێکخراوی تیرۆریستیی داعش خستەڕوو و رایگەیاند "ژمارەی ئەو رفێنردراوە ئێزدییانەی کە تا ئێستا لە دەستی رێکخراوی تیرۆریستیی داعش رزگارکراون، گەیشتووەتە شەش ھەزار و ٤١٧ کەس".

ئاماژەی بەوەیش دا کە ھێشتا دوو ھەزار و ٨٦٧ ئێزدی لە دەستی داعشدا ماون و رزگارنەکراون و گوتی: "ھەوڵەکان بەردەوامن بۆ گەڕان و دۆزینەوەی رفێنردراوە ئێزدییەکان، بەتایبەتیش لە کەمپی ھۆل لە سووریا".

رۆژی سێی ئابی ٢٠١٤دا، تیرۆریستانی داعش ھێرشیان کردە سەر قەزای شنگال رۆژئاوای پارێزگای نەینەوا بەھۆیەوە ژمارەیەکی زۆری کوردی ئێزدی کوژران و برینداربوون، ھەروەھا ژمارەیەکی زۆری دیکەیش ئاوارەبوون، ئەمە وێڕای ئەوەی سەدانی دیکەیش رفێندران کە تا ئێستا چارەنووسی ژمارەیەکی زۆریان نادیارە.