Arbil
هەولێر ــ AA
سەرۆكی هەرێمی كوردستان، نێچیرڤان بارزانی و راوێژكاری ئاسایشی نیشتمانیی عێراق، قاسم ئەعرەجی دوایین پێشهاتەكانی رەوشی ئەمنیی عێراقیان تاوتوێ كرد.
بەپێی راگەیەندراوێكی نووسینگەی راگەیاندنی سەرۆكایەتی هەرێمی كوردستان، نیوەڕۆی ئەمڕۆ یەكشەممە، سەرۆكی هەرێمی كوردستان، نێچیرڤان بارزانی پێشوازی لە راوێژكاری ئاسایشی نیشتمانیی عێراق، قاسم ئەعرەجی كردووە.
لە راگەیەندراوەكەدا ئاماژە بەوەدراوە كە لە كۆبوونەوەیەكدا، دوایین پێشهاتەكانی رەوشی ئەمنیی عێراق، چالاكیی چەكداریی دژبە باڵیۆزخانە و نوێنەرایەتییەكانی وڵاتان لە بەغدا و مەترسی و لێكەوتەكانی، هەڕەشەكان و جموجۆڵی داعش و بەرەنگاربوونەوەیان بەتایبەتی لە ناوچەكانی ماددەی 140ی دەستوور و ئەركی هاوپەیمانیی نێودەوڵەتی دژبە داعش لە عێراق، تاوتوێ كراوە.
ئەوەیش خراوەتەڕوو كە لە كۆبوونەوەكەدا، هەردوولا جەختیان لە پێویستی و كاركردن بۆ پاراستنی ئاسایشی باڵیۆزخانە و نوێنەرایەتییەكانی وڵاتان لە بەغدا و گرنگیی هاوكاری و هەماهەنگیی نێوان پێشمەرگە و سوپای عێراق بۆ رووبەڕووبوونەوەی تیرۆر و چالاكییەكانی داعش تا دڵنیابوونەوە لە لەناوبردنی یەكجارییان، كردووەتەوە.
لە راگەیەندراوەكەی نووسینگەی راگەیاندنی سەرۆكایەتی هەرێمی كوردستان باس لەوەشكراوە كە رەوشی ناوچەكە بەگشتی و چەند پرسێكی دیكەی جێی بایەخی هاوبەش، بەشێكی دیكەی كۆبوونەوەكە بوون كە وەزیری ناوخۆی هەرێمی كوردستان و سەرۆكی دیوانی سەرۆكایەتیی هەرێمی كوردستان، ئامادەی بوون.
بۆ خوێندنەوەی درێژەی ئەم هەواڵە و هەواڵەکانی دیکەی ئاژانسی ئانادۆڵو، ببە بە ئابۆنەی ئاژانسی ئانادۆڵو و کلیک لەسەر ئەم بەستەرە بکەن
