نێچیرڤان بارزانی: "تیرۆریزم ھێشتا ھەڕەشەیەکی جدییە لە جیھاندا".

هەولێر - AA

سەرۆکی ھەرێمی کوردستان نێچیرڤان بارزانی لەیادی ھێرشەکانی ١١ی سێپتەمبەردا تویتێکی بڵاوکردەوە کە تیاییدا وێرای دەربڕینی هاوسۆزی خۆی لەگەڵ گەلی ئەمریکا، جەختیش لەوە دەکاتەوە کە تیرۆریزم هەڕەشەیەکی جدییە لە جیهاندا و پێویستە بەیەکەوە رووبەڕووی ببینەوە.

سەرۆکی ھەرێمی کوردستان نێچیرڤان بارزانی لە تویتێکدا بەبۆنەی یادی ھێرشەکانی ١١ی سێپتەمبەر لە تۆڕی کۆمەڵایەتی تویتەر نوسیوویەتی: "ھەرێمی کوردستانی عێراق لە ساڵڕۆژی ھێرشە تیرۆریستییەکانی ١١ی سێپتەمبەردا ھاوسۆزی خۆی لەگەڵ ئەمریکا دووپات دەکاتەوە".

نێچیرڤان بارزانی لە بەشێکی دیکەی تویتەکەیدا، جەختی لە رووبەڕووبوونەوەی تیرۆر کردووەتەوە و تیاییدا نوسیوویەتی: "تیرۆریزم ھێشتا ھەڕەشەیەکی جدییە لە جیھاندا، پێویستە یەکگرتوو بین بۆ رووبەڕووبوونەوە و تێکشکاندنی".

رۆژی ١١ی ئەیلوولی ٢٠٠١ لەلایەن رێکخراوی تیرۆریستی ئەلقاعیدە هێرش کرایە سەر تاوەری بازرگانی و بارەگای وەزارەتی بەرگریی ئەمریکا لە ناوچەی منهاتن لە شاری نیویۆڕک کە لە ئەنجامدا نزیکەی سێ هەزار کەس بوونە قوربانی.