مستەفا کازمی: "چاوەڕوانین دەنگ لەسەر ئەندامانی کابینە پێشنیازکراوەکەم بدرێت"

هەولێر - AA

راسپێردراو بۆ پێکھێنانی کابینەی نوێی حکوومەتی عێراق، مستەفا کازمی رایگەیاند، لیستی ناوی ئەندامانی کابینەکەی پێشکەش بە ئەنجوومەنی نوێنەران کردووە و چاوەڕوانە لە ئەنجوومەنی نوێنەران دەنگی لەسەر بدرێت.

مستەفا کازمی لە ھەژماری تایبەتی خۆی لە تۆڕی کۆمەڵایەتی تویتەر نووسییەتی: "لیستی ناوی ئەندامانی کابینە پێشنیازکراوەکەم نارد بۆ پەرلەمان و چاوەڕوانین دەنگدانی لەسەر ئەنجام بدرێت".

مستەفا کازمی راشیگەیاندووە: "ھەوڵمدا باشترین پالێوراو بۆ ھەریەک لە وەزارەتەکان ھەڵبژێرم، بە ھیوای متمانە پێ بەخشینیان".

مستەفا کازمی ھەروەھا لە تویتەکەیدا کە بەهەرسێ زمانی عەرەبی، کوردی و ئینگلیزی نووسیوویەتی، ئاماژەی بەوەکردووە: "ئامانجمان خزمەتکردن و دابینکردنی ئارامی و دادپەروەری و خۆشگوزەرانییە بۆ گەلی عێراق".

رۆژی نۆی نیسانی رابردوو سەرکۆماری عێراق، بەرهەم ئەحمەد ساڵح سەرۆکی دەزگای هەواڵگریی نیشتمانیی، مستەفا کازمی بۆ پێکهێنانی کابینەی نوێی حکوومەت راسپارد.