Zana Natık Kerem
02 حوزەیران 2020•نوێکردنەوە: 03 حوزەیران 2020
بەغدا - AA
سەرۆکوەزیران و فەرماندەی گشتیی هێزە چەکدارەکانی عێراق، مستەفا کازمی سەرپەرشتی بەڕێوەچوونی قۆناغی دووەمی ئۆپەراسیۆنی پاڵەوانەکانی عێراق کرد کە هێزە عێراقییەکان بە ئامانجی راوەدوونانی تیرۆریستانی داعش لە پێنج میحوەری کەرکووک دەستیان پێکردووە.
نووسینگەی سەرۆکوەزیرانی عێراق بڵاوی کردەوە کە بەیانی ئەمڕۆ سێشەممە، مستەفا کازمی سەردانی فەرماندەیی ئۆپەراسیۆنە هاوبەشەکان لە کەرکووک کرد و لە میانیدا لەگەڵ فەرماندە سەربازی و ئەمنییەکان کۆبووەتەوە.
بەپێی راگەیەندراوەکە دوای کۆبوونەوەکە، سەرۆکوەزیران و فەرماندەی گشتیی هێزە چەکدارەکانی عێراق، مستەفا کازمی سەرپەرشتی بەڕێوەچوونی قۆناغی دووەمی ئۆپەراسیۆنی پاڵەوانەکانی عێراق کردووە و دواتر ئەو یەکە سەربازییانەی بەسەرکردووەتەوە کە لە ئۆپەراسیۆنەکەدا، بەشداری دەکەن.
لە راگەیەندراوەکەدا ئەوەیش خراوەتەڕوو کە لە میانی بەسەرکردنەوەی یەکە سەربازییەکاندا، مستەفا کازمی ئەوەی گوتووە "هێزە ئەمنییەکان بەردەوام دەبن لە راوەدوونانی تیرۆریستانی داعش و دەستگیرکردنی کەسانی داواکراو، بۆ ئەوەی ئاسایش و سەقامگیری لەسەرتاسەری وڵاتەکەمان پتەوتر بێت".
لە کۆتایی راگەیەندراوەکەدا باس لەوەکراوە کە سەرۆکوەزیران مستەفا کازمی سەردانی یەکێک لە خێزانە نیشتەجێبووەکانی گوندی سەعیدی سەربە قەزای داقووق باشووری رۆژئاوای کەرکووک-ی کردووە بۆ ئەوەی لە رەوشی گوزەرانیان بکۆڵێتەوە و داواشی لە هێزە ئەمنییەکان کردووە کە هەوڵەکانیان زیاتر بۆ پاراستنی گیانی هاووڵاتییان بخەنەگەڕ.
بەیانی ئەمڕۆ سەرۆکوەزیران و فەرماندەی گشتیی هێزە چەکدارەکانی عێراق، مستەفا کازمی بە ئامانجی سەرپەشتیکردنی قۆناغی دووەمی ئۆپەراسیۆنی پاڵەوانەکانی عێراق گەیشتبووە پارێزگای کەرکووک.
