لە ئۆپەراسیۆنێکی دژە تیرۆری عێراق لە چیای قەرەچووغ ١٠ تیرۆریستی داعش کوژران

هەولێر - AA

دەزگای دژە تیرۆری عێراق رایگەیاند، لە ئاکامی ئۆپەراسیۆنی هێزەکانیان بە پاڵپشتی ئاسمانی فڕۆکە جەنگییەکانی هاوپەیمانی نێودەوڵەتی بۆسەر ئامانجەکانی رێکخراوی تیرۆریستی داعش لە چیای قەرەچووغ باشووری قەزای مەخموور، ١٠ تیرۆریستی داعش کوژران.

دەزگای دژە تیرۆری عێراق رایگەیاند، بە فەرمانی فەرماندەی گشتی هێزە چەکدارەکانی عێراق و بە پاڵپشتی ئاسمانی فڕۆکە جەنگییەکانی سوپای عێراق و هاوپەیمانی نێودەوڵەتی ئۆپەراسیۆنێکیان بۆسەر پێگەکانی رێکخراوی تیرۆریستی داعش لە چیای قەرەچووغ باشووری قەزای مەخموور ئەنجامداوە.

لە راگەیەنراوەکەدا کە کۆپییەکی گەیشتووەتە ئاژانسی ئانادۆڵو، ئاماژە بەوە دراوە کە لە ئاکامی ئۆپەراسیۆنەکەدا ١٠ تیرۆریست و پاشماوەکانی داعش کوژراون و نۆ ئەشکەوت و کۆگای کەلوپەلی خۆراک و دەرمانی رێکخراوەکە خاپوور کراون.

دەزگای دژە تیرۆری عێراق ئەوەی خستووەتە روو کە لە میانی سێ مانگی رابردوودا تواناکانی ئەو رێکخراوەیان سنووردارکردووە و جەختی لەوە کردووەتەوە کە بە توانای پاڵەوانەکانیان کۆتایی بە رێکخراوەکە و چالاکییە تیرۆریستییەکانیان دەهێنن.