عێراق.. بڕیاری کشاندنەوەی ھێزەکانی بەرەنگاربوونەوەی توندوتیژی لە شەقامەکانی ناسرییە
- پارێزگاری نوێی زیقار، عەبدولغەنی ئەسەدی بڕیارێکی نوێی بە ئامانجی رێگرتن لە پێکھەڵپژانی نێوان ھێزەکانی بەرەنگاربوونەوەی توندوتیژی و خۆپیشاندەران لە ناسرییە سەنتەری پارێزگاکە دەرکرد.
Arbil
ھەولێر ــ AA
پارێزگاری نوێی زیقار، عەبدولغەنی ئەسەدی بڕیارێکی نوێی بە ئامانجی رێگرتن لە پێکھەڵپژانی نێوان ھێزە ئەمنییەکان و خۆپیشاندەران لە ناسرییە سەنتەری پارێزگاکە دەرکرد.
لەمبارەیەوە سەرچاوەیەک لە حکوومەتی عێراق بە میدیاکانی خۆجێی رایگەیاندووە کە عەبدولغەنی ئەسەدی، بڕیاری داوە ھێزەکانی بەرەنگاربوونەوەی توندوتیژی لە شەقامەکانی شاری ناسرییە بکشێندرێنەوە و لە شوێنی ئەوان، ھێزەکانی سوپا و پۆلیس بڵاوبکرێنەوە.
سەرچاوەکە گوتیشی: "ئەو بڕیارە لە چوارچێوەی فەرمانەکانی سەرۆکوەزیران و فەرماندەی گشتیی ھێزە چەکدارەکانی عێراق، مستەفا کازمی دەرکراوە ئەوەیش بە ئامانجی بەرگرتن لە روودانی پێکھەڵپژانی نێوان ھێزەکانی بەرەنگاربوونەوەی توندوتیژی و خۆپیشاندەران".
ماوەی چەند رۆژێکە خۆپیشاندان لە شاری ناسرییە سەنتەری پارێزگای زیقار باشووری عێراق، دژبە بە نەبوونی خزمەتگوزاری گشتیی، ئەنجام دەدرێت.
لەژێر فشاری خۆپیشاندانەکانی چەند رۆژی رابردوودا پارێزگاری زیقار، نازم حەمید وائیلی دەستی لەکارکێشایەوە و سەرۆکی دەزگای ئاسایشی نیشتمانیی، عەبدولغەنی ئەسەدی وەک پارێزگاری نوێ دەستنیشانکرا.
پێشتر کۆمیسیۆنی باڵای مافەکانی مرۆڤ لە عێراق رایگەیاندبوو کە لە میانی پێنج رۆژی خۆپیشاندانەکانی شاری ناسرییە ناوەندی پارێزگای زیقار، پێنج خۆپیشاندەر کوژراون و ٢٧١ کەسیش برینداربوون کە ١٤٧یان کارمەندی ئەمنیین.
