هەولێر - AA

ئەمڕۆ دووشەممە، هەردوو مەکتەبی سیاسیی پارتی دیموکراتی کوردستان و یەکێتیی نیشتمانیی کوردستان لە پیرمام کۆدەبنەوە و گفتوگۆ لەسەر بابەتە پەیوەنددارەکان بەدۆخی هەرێم دەکەن.

کۆبوونەوەکە بە ئامادەبوونی سەرۆکی پارتی دیموکراتی کوردستان، مەسعود بارزانی و سەرۆکی یەکێتیی نیشتمانیی کوردستان، بافڵ جەلال تاڵەبانی بەڕێوەدەچێت.

لە کۆبوونەوەکەدا هەریەک لە سەرۆکی هەرێمی کوردستان، نێچیرڤان بارزانی و سەرۆکوەزیرانی هەرێم، مەسرور بارزانی، جێگری سەرۆکوەزیران قوباد تاڵەبانی بەشدار دەبن.

بەپێی زانیارییەکان هەردوولا دوو ڕەشنووسی جیاوازیان تایبەت بە کابینەی نوێی حکوومەتی هەرێم ئامادە کردووە و تاوتوێیی ڕەشنووسەکان دەکەن.

ئەوەش زانراوە کە گفتوگۆ لەسەر پەیوەندییەکانی نێوان هەرێم و بەغدا هەروەها هەڵبژاردنی داهاتووی پەرلەمانی عێراق دەکرێت.

ئەمە لە کاتێکدایە کە لە ٢٠ی تشرینی یەکەمی ٢٠٢٤ هەڵبژاردنی خوولی شەشەمی پەرلەمانی کوردستان-عێراق بەڕێوە چوو تێیدا پارتی دیموکراتی کوردستان ٣٩ کورسی و یەکێتیی نیشتمانیی کوردستان ٢٣کورسیی بەدەستهێنا.