سەرۆکی هەرێمی کوردستان پێشوازی لە نادیە موراد کرد

هەولێر AA

سەرۆکی هەرێمی کوردستان، نێچیرڤان بارزانی پێشوازی کرد لە کچە رزگاربووی دەستی داعش و چالاکوانی ئێزدی، نادیە موراد.

نووسینگەی رۆژنامەوانی سەرۆکی هەرێمی کوردستان بڵاویکردەوە کە لە دیدارەکەدا، نێچیرڤان بارزانی رایگەیاندووە کە لەسەر ھەوڵەکانیان بەردەوام دەبن و کار دەکەن بۆ ئەوەی کێشەکانی ئێزدییان و ناوچەی شنگال چارەسەر بکرێن و لەمبارەیەوە لەگەڵ لایەنە پەیوەندیدارەکانی حکوومەتی عێراق و کۆمەڵگای نێودەوڵەتیی ھەموو ھاوکاری و ھەماھەنگییەکی پێویست دەکەن.

لای خۆشیەوە نادیە موراد سوپاس و پێزانینی پێشکەش بە ھەوڵەکانی نێچیرڤان بارزانی بۆ بەرەوپێشبردنی دۆسیەی ئێزدییەکان و خزمەتکردنیان کرد.

ئاماژەی بەوەیشکردووە کە ھەردوولا پرسی گێڕانەوەی کۆمەڵێک رووفاتی قوربانییانی ئێزدی بۆ گوندی کۆچۆ و رێککەوتنی شنگال و چەند بابەتێکی دیکەی پەیوەست بە کاروباری ئێزدییانیان تاوتوێ کرد.