سەرکۆماری عێراق: "دەبێت زمانی سازان بکەینە بناغەی کاری ھاوبەشمان"

ھەولێر – AA

سەرکۆماری عێراق، عەبدولـلەتیف رەشید رایگەیاند "دەبێت زمانی سازان و لێکتێگەیشتن، بکەینە بناغەی کاری ھاوبەشمان".

عەبدولـلەتیف رەشید لە میانی رێوڕەسمی کردنەوەی یادگەی نیشتمانیی بارزانی-دا کە ئەمڕۆ لە دەڤەری بارزان بەڕێوەچوو، راگەیاند "پێویستە کار بکەین، بۆ ئەوەی مێژووی سەرکردەکانمان بە زیندوویی بھێڵینەوە".

ئاماژەی بەوەیشدا کە کاتی ئەوە ھاتووە، ھەمووان ھەوڵبدەن بە تەبایی ئەم قۆناغە تێپەڕێنن و گوتی: "دەبێت زمانی سازان و لێکتێگەیشتن، بکەینە بناغەی کاری ھاوبەشمان".

ئاماژەی بەوەیشدا کە ئێستا دەرفەتێکی باش ھاتووەتە ئاراوە و پێویستە ھەموومان ئەو دەرفەتە بقۆزینەوە و گفتوگۆی ئاشتییانە ئەنجام بدەن و ناکۆکییە سیاسییەکان بەلاوە بنێن بۆ ئەوەی بتواندرێت ژێرخانی وڵات ببوژێندرێتەوە.

گوتیشی: "ئێستا حکوومەتی عێراق و حکوومەتی ھەرێمی کوردستان نیازی جیددیان ھەیە، بۆ چارەسەرکردنی کێشە ھەڵپەسێردراوەکان".

ئەمڕۆ پێنجشەممە بە سەرپەرشتی و ئامادەبوونی سەرۆکی پارتی دیموکراتی کوردستان، مەسعود بارزانی، ھەروەھا بە ئامادەبوونی دەیان کەسایەتی سیاسیی کوردستانی، عێراقی، بیانی، باڵیۆز و نوێنەری وڵاتان یادگەی نیشتمانیی بارزانی لە بارزان کرایەوە.