سەرۆکوەزیرانی عێراق: "گەلی کورد قوربانی زۆری بۆ ئازادی داوە"

ھەولێر – AA

سەرۆکوەزیرانی عێراق، محەمەد شیاع سوودانی رایگەیاند کە گەلی کورد رووبەڕووی تاوانکاریی رژێمی پێشوو بوویەوە و قوربانی زۆری بۆ ئازادی داوە.

محەمەد شیاع سوودانی لە میانی رێوڕەسمی کردنەوەی یادگەی نیشتمانیی بارزانی-دا کە ئەمڕۆ لە دەڤەری بارزان بەڕێوەچوو، رایگەیاند کە مستەفا بارزانی خەباتی بەرامبەر ستەمکاران کرد و گوتی: "گەلی کورد رووبەڕووی تاوانکاریی رژێمی پێشوو بوویەوە و قوربانی زۆری بۆ ئازادی داوە".

راشیگەیاند کە گەلی کورد و لایەنەکانی دیکەی عێراق، لەم شاخە سەربەرزانەی هەرێمی کوردستان بۆ ماوەی چەندین دەیە رووبەڕووی ستەم بوونەوە.

گوتیشی: "دەبێت بە کردار بیسەلمێنین کە خزمەتی عێراقییەکان دەکەین".

ئەمڕۆ پێنجشەممە بە سەرپەرشتی و ئامادەبوونی سەرۆکی پارتی دیموکراتی کوردستان، مەسعود بارزانی، ھەروەھا بە ئامادەبوونی دەیان کەسایەتی سیاسیی کوردستانی، عێراقی، بیانی، باڵیۆز و نوێنەری وڵاتان یادگەی نیشتمانیی بارزانی لە بارزان کرایەوە.