سەرۆکوەزیرانی هەرێمی کوردستان سەردانی سەرکۆماری عێراقی کرد

هەولێر - AA

سەرۆکوەزیرانی هەرێمی کوردستان نێچیرڤان بارزانی بەیاوەری جێگری سەرۆکوەزیران قوباد تاڵەبانی، سەردانی سەرکۆماری عێراق فوئاد مەعسومی لە شاری هەولێر کرد و زیاتر لە نیو کاتژمێر کۆبوونەوە.

بەپێی زانیارییەکان لە کۆبوونەوەکەدا بارودۆخی شاری کەرکووک و دەستپێکردنی گفتوگۆی نێوان هەولێر و بەغدا تاوتوکراوە.

دوای کۆبوونەوەکەش سەرۆکۆماری عێڕاق فوئاد مەعسووم بڕیارە سەردانی مەسعود بارزانی بکات لە پیرمام و ئێوارەی ئەمڕۆش لە رێگای فڕۆکەخانەی نێودەوڵەتی هەولێرەوە بەرەو بەغدا دەگەڕێتەوە.

دوای کۆبوونەوەکە هیچ کام لە سەرکۆماری عێراق و سەرۆکوەزیرانی هەرێمی کوردستان قسەیان بۆ میدیاکان نەکرد.

سەرۆکۆماری عێراق، فوئاد مەعسووم، ماوەی پێنج رۆژە گەڕاوەتەوە ھەرێمی کوردستان، سەرەتا لە شاری سلێمانی و کەرکووک چەندین کۆبوونەوەی لەگەڵ بزووتنەوەی گۆڕان و یەکێتی نیشتمانی کوردستان ئەنجامدا.