رووداوێکی هاتوچۆ لە کەرکووک گیانلەدەستدانی سێ کەسی لێکەوتەوە

هەولێر - AA

لە رووداوێکی هاتوچۆدا لەسەر رێگای کەرکووک-هەولێر لەنێوان ئۆتۆمبیلێکی جۆری هیوندای تاکسی و ئۆتۆمبیلێکی کیای تایبەتدا، چەند کەسێک گیانیان لەدەست دا و چەند کەسێکیش برینداربوون کە برینی هەندێکیان سەختە.

بەگوتەی شایەتحاڵەکان لە شوێنی رووداوەکە تاوەکو ئێستا بەهۆی ئەو رووداوەوە، سێ کەس گیانیان لەدەستداوە و چەند کەسێکیش بە برینداری رەوانەی نەخۆشخانە کراون.

رووداوەکە لە ئاراستەی بەرەو کەرکووک لە نزیک گوندی یارمجە روویداوە و بەهۆی پێکدادانەکەشەوە ئۆتۆمبیلە تاکسییەکە ئاگری گرتووە و بەتەواوی سووتاوە.

لە هەفتەی رابردووەوە ئەمە دووەم رووداوی هاتوچۆیە لەسەر رێگاکانی دەرەوەی شاری کەرکووک روودەدەن، سەرەتای هەفتەی رابردوو لەسەر رێگەی کەرکووک-سلێمانی رووداوێکی هاتوچۆ رووی دا و بەهۆیەوە شەش کەس گیانیان لەدەست دا، لەم رووداوەی ئەمرۆشدا، تاوەکو ئێستا سێ کەس گیانیان لەدەستداوە و چەند کەسێکیش بریندارن.​​​​​​​