ته‌ندروستی سلێمانی: "كاره‌ساتێكی مرۆیی چاوەڕوانمانە"

سلێمانی - AA

به‌ڕێوه‌به‌ری گشتی ته‌ندروستی سلێمانی پێشبینی ده‌كات كە رۆژانه‌ ٢٠٠ كه‌س تووشی ڤایرۆسی كۆرۆنابن و، راشیده‌گه‌یه‌نێت كه‌ ئه‌و دۆخه‌ی ئێستا تێیكه‌وتوون باجی ئه‌و قه‌ره‌باڵغییه‌ ده‌ده‌ن كه‌ له‌ ره‌مه‌زان و رۆژانی جه‌ژندا ئه‌نجامدرا.

به‌ڕێوه‌به‌ری گشتی ته‌ندروستی سلێمانی، سه‌باح هه‌ورامی به‌ میدیایی ناوخۆیی هەرێمی کوردستانی راگەیاندووە‌ كه‌، لەسەدا ٨٠ تووشبووان بە ئاسانی نەخۆشیەکە تێدەپەڕێنن، لەسەدا ٢٠ەکەی دیکە بە سەختی دەیگرن کە ھەندێکیان گیانله‌ده‌ست ده‌ده‌ن، جه‌ختیشی له‌وه‌ كردووه‌ته‌وه‌ كه‌ نایانه‌وێت كه‌س بترسێنن به‌ڵام نه‌خۆشییه‌كه‌ بۆخۆی ترسناكه‌ و كاره‌ساتی ناوه‌ته‌وه‌.

له‌ به‌شێكی دیكه‌ی قسه‌كانیدا، به‌ڕێوه‌به‌ری گشتی ته‌ندروستی سلێمانی رایگه‌یاندووه‌ كه‌، ململانێیەکی زۆر سەختی سیاسیی، سەربازیی، بازرگانی و راگەیاندن ئەم ناوچەیەی گرتووەتەوە، بەداخەوە دۆسیەی کۆرۆنا تێکەڵ بەو دۆسیانە کراوە و، لە ھیچ لایەکی قبوڵ ناکەین کاری ئێمە بۆ بەرژەوەندی خۆی بەکاربھێنێت.

سه‌باح هه‌ورامی هۆشداریشی داوه‌ كه‌ هه‌موو كه‌سێك تووشی ڤایرۆسی كۆرۆنا ده‌بێت و گوتوویه‌تی: ''دڵنیابن لەوەی یەک کەس نامێنێت کۆرۆنا نەگرێت، نابێت گرتنی کۆرۆنا بە عەیبە بزانین، بەس ناشکرێت خۆمان تووش بکەین بۆ ئەوەی لەکۆڵمان ببێتەوە، چونكه‌ پێشتر لە ھەڵکشانی یەکەمدا رۆژانە ١٠ کەس تووشی کۆرۆنا دەبوون، ئێستا رۆژانە ١٠٠ کەس زیاتر تۆمار دەکرێت، من پێشبیبی دەکەم رۆژانە ٢٠٠ کەس تووشی کۆرۆنا بووبێت، ژمارەکە زۆر لەوە زیاترە کە رادەگەیەنرێت''.

نه‌شیشاردووه‌ته‌وه‌ كه‌ ئه‌م دۆخه‌ی ئێستا باجی ئه‌و قه‌ره‌باڵغییه‌یه‌ كه‌ هاووڵاتییان له‌ رۆژانی جه‌ژن ئه‌نجامییان داوه‌ و گوتوویه‌تی: ''ئەم دۆخەی ئێستا تێیکەوتووین باجی ئەو قەرەباڵغییە دەدەین کە لە رەمەزان و جەژندا ئەنجامدرا، هه‌روه‌ها رۆژی رابردوو کارمەندانی تەندروستی بۆیان باس دەکردم لە چاودێری کردنی نەخۆشەکانەوە بۆیان دەرکەوت کە ئەم ڤایرۆسە چۆن سیستەمی ھەناسەدانیان تێکدەشکێنێت''.

به‌ گوته‌ی به‌ڕێوه‌به‌ری گشتی ته‌ندروستی سلێمانی سەباح هەورامی، كاتی ئه‌وه‌ نه‌ماوه‌ خه‌ڵك هۆشیاربكرێته‌وه‌ چونكه‌ نه‌خۆشییه‌كه‌ له‌ ته‌شه‌نه‌كردندایه‌ و ده‌شڵێت: ''کاتی ئەوەمان نەماوە دانیشین ھۆشیاری بدەینە خەڵک، ھەموو سەرنجەکانمان لەسەر ئەوەیە چۆن بتوانین نەخۆشخانەکان کۆنتڕۆڵبکەین، لە ئێستادا شوێنمان نەماوە، تەنھا سێ پزیشکی چاودێری چڕمان ھەیە، هه‌روه‌ها کارمەندی خۆبەخشمان ھەیە لە کەرتی تەندروستی بۆ ئەوەی کەسوکاری تووشی کۆرۆنا نەکات، ناچێتەوە ماڵ و ناچاربووین شوێنی بۆ بەکرێ بگرین تاکو ڤایرۆسەکە نەگوازێتەوە بۆ دایکی کە نەخۆشی شێرپەنجەی ھەیە''.

پێشی وایە کە راگه‌یاندنی قه‌ده‌غه‌ی هاتوچۆ بۆ ماوه‌ی پێنج رۆژ، چاره‌سه‌رێكی كاتیی ده‌كات بۆ كه‌مكردنه‌وه‌ی فشار له‌سه‌ر كه‌رتی ته‌ندروستی و ده‌شڵێت: ''بە بۆچوونی من کەرەنتینەیەکی پێنج رۆژیی چارەسەرێکی کاتیی ئەو فشارە دەکات کە لەسەر کەرتی تەندروستییە، ئەگەریش سەرەتای کەرەنتین، رێوشوێنی توند نەگیرانایەتە بەر، ھاووڵاتی خۆپارێزی نەکردایە رۆژانە ١٠٠ کەس گیانیان لەدەستدەدا بەھۆی کۆرۆناوە''.

له‌باره‌ی مانگرتنی كارمه‌ندانی ته‌ندروستیش سه‌باح هه‌ورامی دەڵێت، "مانگرتنی پزیشکان و کارمەندانی تەندروستی بەردوامە، تەنیا شوێنە گەرمەکان بەردەوامن لە خزمەتکردن".