"تا ئێستا 13 پزیشك لە عێراق بەهۆی كۆرۆناوە گیانیان لەدەستداوە"

بەغدا ــ AA

نەقیبی سەندیكای پزیشكانی عێراق، عبدولئەمیر شممەری رایگەیاند كە لە مانگی شوباتی رابردووە تا ئێستا، 13 پزیشك بەهۆی ڤایرۆسی كۆرۆنای نوێ (COVID-19)وە گیانیان لەدەستداوە و 775ی دیكەیش تووشی ڤایرۆسەكە بوون.

عەبدولئەمیر شممەری لە لێدوانێكدا بۆ ئاژانسی ئانادۆڵو گوتی: "تا ئێستا 13 پزیشك لە عێراق بەهۆی ڤایرۆسی كۆرۆناوە گیانیان لەدەستداوە و 775ی دیكەیش تووشی ڤایرۆسەكە بوون".

نەقیبی سەندیكای پزیشكانی عێراق باسی لەوەیش كرد كە پزیشكان بەپێی توانا، خزمەتگوزارییەكان پێشكەش بە نەخۆشەكان دەكەن و گوتی:

"رۆژانە ئەو پزیشكانەی كە لە بەرەنگاربوونەوەی ڤایرۆسی كۆرۆنا خزمەت دەكەن لەلایەن كەسوكاری ئەو كەسانەی كە بەهۆی ڤایرۆسەكەوە گیان لەدەستدەدەن، رووبەڕووی هێرش و سووكایەتی پێ كردن دەبنەوە".

بەپێی دوایین ئامارەكان تا ئێستا، 43 هەزار و 262 كەس لە عێراق تووشی ڤایرۆسی كۆرۆنا بوون و لەو ژمارەیەیش هەزار و 660 كەس گیانیان لەدەستداوە و 19 هەزار و 938ی دیكەیش چاكبوونەتەوە.