پێشانگەیەكی تایبەت بە كارەساتی شنگال

- لە شاری سلێمانی یانزەهەمین پێشانگەی تایبەتی فۆتۆگرافەر، ناسیح عەلی خەیات كرایەوە، فۆتۆكان ئاماژەن بە نەهامەتی و ئەو كارەساتەی بەسەر دانیشتوانی شنگال لە كاتی داگیركردنی شارەكەیان لە لایەن داعشەوە و ئاوارەبوونیان بۆ سەر چیاكان دەكات.

سلێمانی ـ AA

پێشانگەكە پێش نیوەڕۆی ئەمڕۆ لە بەردەم باخی گشتی شاری سلێمانی بە ناونیشانی (هەناسەیەك بۆ ئاسوودەیی شنگال، یادێك بۆ سارێژی زامەكانی شنگالییەكان) لە لایەن بەڕێوەبەرایەتی گشتی رۆشنبیری و هونەری سلێمانی كرایەوە.

فۆتۆگرافەر، ناسیح عەلی خەیات لەو بارەیەوە بۆ ئاژانسی ئانادۆڵو گوتی: "لە پێشانگەكەدا، 30 فۆتۆی تایبەت بە جینۆساید و نەهامەتی ئێزدییەكانی شنگال نمایش كراوە، كە ئاماژە بە تراجیدیا و جینۆساید و ئەو نەهامەتیانە دەكات كە لەكاتی داگیركردنی شنگال ئێزدییەكانی بەدەستی داعش بەسەریان هاتووە و چیرۆكی ژیانیان باس دەكات".

ئەو گوتی: " فۆتۆكان لە رۆژی 16ی ئابی 2014 لەسەر چیای شنگال گیراون، لەو كاتەی ئێزدییەكانی شنگال بە هۆی داگیركردنی شارەكەیانەوە و بۆ رزگاركردنی گیانی خۆیان، بەرەو چیای شنگال ئاوارەبوون و ژیانێكی زەحمەتیان لەو كاتەدا بەڕێدەكرد".

ئەم پێشانگایە پێشتر بۆ ئێزدییەكانی كەمپی ئاشتی لە عەربەت نمایش كراوە، ساڵی 2016 ش لە فێستیڤاڵێكی تایبەت بە شنگال لە فەڕەنسا بەم وێنانەوە بەشداری كردووە و خەڵاتی بەدەستهێناوە.