په‌یه‌ده‌، به‌ره‌و ده‌وروبه‌ری رووباری فورات جووڵه‌ ده‌كات

هێزه‌كانی په‌یه‌ده‌، له‌ ده‌وروبه‌ری رووباری فورات ناحیه‌یه‌ك و 11 گوندی له‌ ده‌ست رێكخراوی تیرۆریستی داعش کۆنتڕۆڵ كرد.

له‌ كاتێكدا شه‌ڕ و پێكدادانه‌كانی نێوان هێزه‌كانی په‌یه‌ده‌ و رێكخراوی تیرۆریستی داعش له‌ ره‌ققه‌ راوه‌ستاوه‌، په‌یه‌ده‌ ئاڕاسته‌ی هێرشه‌كانی روو له‌ خۆرئاوای رووباری فورات كردووه‌.

په‌یه‌ده‌، كه‌ له‌ تشرینی یه‌كه‌می 2015دا، له‌ سه‌ر هاندانی ئه‌مریكا خۆی له‌ ژێر چه‌تری گرووپه‌ كوردی و عه‌ره‌بیه‌كان SDG رێكخست، به‌رده‌وامه‌ له‌سه‌ر هێرشه‌كانی له‌ ده‌وروبه‌ری رووباری فورات و له‌ژێر ناوی SDG ئۆپه‌راسیۆنه‌كانی له‌ ناوچه‌كه‌دا به‌ڕێوه‌ ده‌بات.

به‌پێی ئه‌و زانیارییانه‌ی ئانادۆڵو له‌ سه‌رچاوه‌ ناوخۆییه‌كانی ناوچه‌كه‌وه‌ ده‌ستی كه‌وتووه‌، ئه‌و ناوچانه‌ی په‌یه‌ده‌ له‌ خۆرئاوای فورات كۆنترۆڵی كردوون بریتین له‌: ناحیه‌ی ئه‌بوقالقال و گونده‌كانی ماشی، مونیحال، ساكاڤیا، ساندالیا، غه‌راح، حالولا و حیربه‌ت ئه‌روس، له‌گه‌ڵ گونده‌كانی جه‌به‌ل شاش و رومه‌یلاتی باشووری ناحیه‌ی تشرین. هه‌روه‌ها له‌ خۆرهه‌لاتی فورات كۆنترۆڵی گونده‌كانی ته‌لعوسمان و كاراقۆزاقی كردووه‌، جگه‌ له‌وانه‌ش له‌ باكووری خۆرئاوای به‌نداوی تشرین كۆنترۆڵی قه‌ڵای نه‌جمی كردووه‌.

سه‌رچاوه‌كان باس له‌وه‌ش ده‌كه‌ن كه‌ په‌یه‌ده‌ ته‌واوی هێزه‌كانی له‌ ناوچه‌كانی ئه‌بوقالقال و ماشی خۆرئاوای رووباری فورات كۆكردووه‌ته‌وه‌ و ئاماده‌كاریی كردووه‌ له‌ رێگه‌ی گوندی حیربه‌ت ئه‌روسه‌وه‌ هێرش بكاته‌ سه‌ر گوندی مونبیچی ژێر ده‌سه‌ڵاتی رێكخراوی تیرۆریستی داعش.

هێزی هاوپه‌یمانان به‌ رابه‌رایه‌تی ئه‌مریكا ناوبه‌ناو بۆردومانی بنكه‌ و باره‌گاكانی رێكخراوی تیرۆریستی داعش ده‌كات له‌ ده‌وروبه‌ری فورات، به‌تایبه‌تیش ئه‌و رێگایانه‌ ده‌كه‌نه‌ ئامانج كه‌ داعش له‌ جه‌رابلوسه‌وه‌ هێزی پشتیوانی پێدا ره‌وانه‌ی ناوچه‌كه‌ ده‌كات، ئه‌مه‌ و دوێنێ و ئه‌مڕۆ باره‌گاكانی داعشی له‌ مونبیچ بۆردومان كرد.

یه‌كێك له‌ دانیشتوانی گونده‌ توركمانه‌كانی ناوچه‌كه‌، به‌ ئانادۆڵوی راگه‌یاند كه‌ هێزه‌كانی په‌یه‌ده‌ به‌پشتیوانی ئاسمانی ئه‌مریكا، چیاكانی ده‌وروبه‌ری گوندی كاراقۆزاكی توركمانی كۆنترۆڵ كردووه‌ كه‌ گرنگی ستراتیژییان هه‌یه‌.

هه‌روه‌ها سه‌رچاوه‌كان باس له‌وه‌ش ده‌كه‌ن كه‌ په‌یه‌ده‌ له‌ رێگه‌ی هه‌ندی لایه‌نی ناو SDGه‌وه‌ هه‌وڵی چڕ ده‌دات بۆ ده‌ستخستنی پشتیوانی عه‌ره‌ب و توركمانه‌كانی ناوچه‌كه‌.

چاوه‌ڕوان ده‌كرا ناوه‌ڕاستی مانگی رابردوو هێزه‌كانی په‌یه‌ده‌ به‌پشتیوانی هێزی ئاسمانی ئه‌مریكا، ده‌ست به‌ ئۆپه‌راسیۆنێكی گشتگیر بكات به‌ره‌و باكووری شاری ره‌ققا كه‌ ناوه‌ندی رێكخراوی تیرۆریستی داعشه‌ به‌ڵام هه‌فته‌ی رابردوو په‌یه‌ده‌ له‌ گوندی شیخ عیسای ره‌ققه‌ ده‌ستی به‌ ئۆپه‌راسیۆنه‌كه‌ كرد، دوای ئه‌وه‌شی ژماره‌یه‌كی زۆر له‌ چه‌كداره‌كانی كوژران هێرشه‌كانی له‌وێدا راگرت.

په‌یه‌ده‌ ده‌یه‌وێت ناوچه‌كانی نێوان عه‌فرین و كۆبانێ له‌ده‌ست داعش و لایه‌نه‌كانی ئۆپۆزسیۆنی سووریا وه‌ربگرێته‌وه‌ و به‌یه‌كیانه‌وه‌ ببه‌ستێته‌وه‌. به‌و ئامانجه‌ش به‌ره‌و ناوچه‌كانی مونبیچ و جه‌رابلوس له‌ خۆرئاوای رووباری فورات پێشڕه‌وی ده‌كات. پێشڕه‌وییه‌كانیشی په‌یوه‌سته‌ به‌ پشتیوانی ئاسمانی ئه‌مریكاوه‌.

هێزه‌كانی په‌یه‌ده‌، به‌پشتیوانی ئاسمانی ئه‌مریكا، له‌ كانوونی دووه‌می 2015 كۆنترۆڵی كۆبانێ-ی كرد، له‌ مانگی ئایاریشدا گرێ سپی له‌ داعش پاك كرده‌وه‌. ئه‌گه‌ر په‌یه‌ده‌ به‌ ئامانجه‌كانی بگات ئه‌وە باڵاده‌ست ده‌بێت به‌سه‌ر ناوچه‌یه‌كدا كه‌ له‌ سنووری باكووری خۆرهه‌ڵاتی سووریاوه‌ ده‌ست پێ ده‌كات و به‌ره‌و سنووری توركیا درێژ ده‌بێته‌وه‌، به‌مه‌ش په‌یوه‌ندی حه‌له‌ب و توركیا ده‌بڕێت و دێته‌ به‌رامبه‌ر شارۆچكه‌ی ره‌یحانڵی توركیا.