كۆنگرەی رۆژنامەوانی سەرۆكی ئەنجوومەنی پارێزگای سلێمانی

سلێمانی ـ AA

شاندەكەی پارێزگای سلێمانی لە سەرۆكی ئەنجوومەنی پارێزگا و لیژنەی پەروەردەی ئەنجوومەنی پارێزگا، بەڕێوەبەری گشتی پەروەردەكانی سنوورەكە، رۆژی رابردوو سەردانی شاری هەولێریان كرد و لەگەڵ سەرۆكایەتی ئەنجوومەنی وەزیران و پەرلەمان، وەزیری دارایی و پەروەردەیان كرد و لەسەر پرسی پەروەردە و چۆنێتی دەستپێكردنەوەی پڕۆسەی خوێندن لە سنوورەكەدا".

سەرۆكی ئەنجوومەنی پارێزگای سلێمانی، ئازاد محەمەد ئەمین لە كۆنگرەكەدا گوتی: "لە میانەی كۆبوونەوە و دیدارەكاندا لە داخوازی و داواكارییەكان گرنگیمان بە چوار خاڵی هەنووكەیی دا، یەكەم بریتی بوو لە دابینكردنی مووچەیەكی ئانی و بەپەلە بۆ مامۆستایان و هێنانە پێشەوەی مووچەی وەزارەتی پەروەردە بۆ پلەی یەكەم لە ریزی دابەشكردنی مووچەدا، دووەم داوای بەردەوامی هاندانی مامۆستایانمان كرد، سێهەم داوامان كرد بە دابینكردنی زەوی بۆ مامۆستایان، خاڵی چوارەمیش داوامان كرد ساڵی 2016/2017 خزمەتی مامۆستایان بە دوو ساڵ بۆ خانەنشینی هەژمار بكرێت".

ئازاد محەمەد گوتی: "بە خۆشحاڵییەوە سەرۆكایەتی پەرلەمان و جێگری سەرۆكی حكوومەت هاوكار و پشتیوانمان بوون و بەڵێنیاندا هەوڵ بۆ دابینكردنی ئەو بڕە پارەیە بدەن، وەزیری دارایی هەرێمی كوردستانیش بەڵێنی پشتیوانی و هاوكاری كردنی كردین".

لەلای خۆیەوە بەڕێوەبەری گشتی بەڕێوەبەرایەتی پەروەردەی سلێمانی، دڵشاد عومەر گوتی: "داخوازییەكانی مامۆستایانمان خستووەتە بەرچاوی لایەنە بەرپرسەكان، بەڵام لەسەر دابینكردنی مووچەی تەواو بۆ مامۆستایان هەمووان دڵنیا دەكەین ساڵێكی تر و دووانی تریش بێت ئەوا حكومەت ناتوانێت بەو دۆخە مووچەی تەواوەتی بدات، ماوەتەوە سەر خزمەت و بازووی خۆمان بۆ خزمەتی شاری خۆمان".

ئەو گوتی: "لەبەردەم دوو ریانداین، یان ئەوەتا حكوومەت پارە نادات و ئێمەش بەردەوام بین و داهاتوو بفەوتێنین، یان ئەوەتا بەردەوام بین و لەو ماوە كەمەی ماوە پەروەردە بخەینەوە سەر پێی خۆیی و بەو چارەكە مووچەیەی دەدرێت تا كۆتایی ئەمساڵ بەردەوام بین".

بەڕێوەبەری گشتی بەڕێوەبەرایەتی پەروەردەی سلێمانی ئاماژەی بەوەش كرد، هاوكاری تەواوی مامۆستایان دەكەن لە دەوامكردندا و بەڕێوەبەری خوێندنگەكانیشیان سەرپشك كردووە بۆ ئەو مەبەستە، بۆ ساڵی داهاتووش ئەگەر دۆخەكە بەو شێوەیە بەردەوام بێت ئەوا لایەنە بەرپرسەكانیان ئاگادار كردووەتەوە لەوەی لەسەرەتا ساڵەوە بڕیار بدەن لەسەر دواخستنی دەوامی خوێندن تا كاتی باشبوونی مووچە یان بەو شێوەیە ناتوانرێت دەوام بكرێت.

بەڕێوەبەری پەروەردەی سلێمانی باس لەوەش دەكات، داخوازی و داواكاری مامۆستایان رەوایە و ناتوانن لێپرسینەوە لەكەس بكەن بەرامبەر دەوام نەكردنیان، لە ئێستاشدا چەند خوێندنگەیەكی ناوشاری سلێمانی بڕیارانداوە دەست بە پرۆسەی خوێندن بكەنەوە.

لە دوای كۆتایهاتنی تاقیكردنەوەكانی كۆتایی وەرزی یەكەم، مامۆستایانی سنووری پارێزگای سلێمانی دەستیان بە مانگرتن كرد و ئامادە نەبوون بچنەوە هۆڵەكانی خوێندن بۆ دەستپێكردنی وەرزی دووەمی ساڵی خوێندنی ٢٠١٧/٢٠١٨، لەو كاتەوە كە ماوەی مانگێكە تا ئێستا دەرگای خوێندنگەكانی ئەم پارێزگایە داخراون و سەرەڕای داواكاری لایەنە جیاجیاكان بۆ دەستپێكردنەوەی پڕۆسەكە، بەڵام مامۆستایانی ناڕازی مكوڕن لەسەر داواكارییەكانیان و ئامادە نین بچنەوە هۆڵەكانی خوێندن.

لە سنووری بەڕێوەبەرایەتی گشتی پەروەردەی پارێزگای سلێمانی، هەزار و ٧٤٣ ناوەندی خوێندن هەیە، لەو ناوەندانەش ٣٩ هەزار و ٧٥٠ مامۆستا و ٤٦٠ هەزار و ٨٣٠ قوتابی هەیە لە قۆناغە جیاجیاكاندا.