سەرۆکی حکوومەتی هەرێمی کوردستان پێشوازیی لە سەرکۆماری عێراق کرد

هه‌ولێر-AA

سەرۆکی حکوومەتی هەرێمی کوردستان، مەسرور بارزانی، پێشوازیی لە سەرکۆماری عێراق، بەرهەم ساڵح کرد.

بەگوێرەی ئەو راگەیەندراوەی کە لە نووسینگەی راگەیاندنی سەرۆکی حکوومەتی هەرێمی کوردستانەوە بڵاوکراوەتەوە، لە دیدارەکەدا، دوا پەرەسەندنەکانی عێراق و ناوچەکە و پەیوەندییەکانی نێوان هەرێمی کوردستان و حکوومەتی فیدراڵی تاوتوێ کراوە و جەخت لە پێویستیی چارەسەر كردنی كێشە هەڵپەسێردراوەكانی نێوان حكوومەتی فیدراڵی و هەرێمی کوردستان لە سەر بنەمای دەستوور کراوەتەوە.

لە تەوەرێكی دیکەی كۆبوونەوەكەدا، گفتوگۆ دەربارەی هەڵبژاردنەکانی ئەنجوومەنی نوێنەرانی عێراق کراوە و لەوبارەیەوە جەخت لەوە کراوەتەوە کە پێویستە هەڵبژاردنێكی پاک و بێگەرد بەڕێوە بچێت، كە ماف و خواستی سەرجەم پێكهاتەكانی عێراق دەستەبەر بكات و ببێتە ھۆی سەقامگیربوونی دۆخی عێراق.