سەرۆکی ئەنجوومەنی نیشتمانیی کورد لە سووریا دەستگیر کرا

سەرۆکی ئەنجوومەنی نیشتمانیی کورد لە سووریا (ئەنەکەسە) کە ھاوکات سکرتێری پارتی یەکێتی کورد لە سووریایە ئیبراھیم برۆ، ئێوارەی رۆژی شەممە ١٣-٨-٢٠١٦ لەلایەن ئاسایشی قامشلۆ دەستگیرکرا.
ئەندامی سەرکردایەتی پارتی دیموکراتی کوردستان-سووریا نوری بریمۆ لەو بارەیەوە رایگەیاند: "كاتژمێر چواری ئێوارەی ئەمڕۆ ئیبراھیم برۆ پەیوەندی بە ئێمەوە کرد و رایگەیاند کە دوای کۆبوونەوەکانی ئەوان لە قامشلۆ کۆنگرە دەبەستن و ھەر دوای ئەو پەیوەندییە تەلەفۆنیە ئیبراھیم برۆ و ماموستا سلێمان ئوسۆ پێکەوە لە رێگەی سەرەکی قامشلۆ لە لایەن ئاسایشی پەیەدە لە قامشلۆ دەستگیرکران".
لە بارەی ھۆکاری دەستگیرکردنی برۆ، بریمۆ گوتی: "چەکدارنی پەیەدە لە دژی خەباتی ئێمەن لەو ناوچەیە، بارەگاکانی ئێمە دادەخەن و ھەموو بێ رێزییەک بە ئێمە دەکەن، لە قامشلۆ و سەری کانی ئەوان نووسینگەکانی پارتی دیموکراتی سوریا دادەخەن".
ئەندامی سەرکردایەتی پارتی دیموکراتی کوردستان-سووریا نوری بریمۆ گوتیشی: "ئەوان فشار دەخەنە سەر ئێمە چونکە ئێمە وەک ئەنجوومەنی نیشتیمانی سازش بۆ ئەوان ناکەین و ناکەوینە ژێر باڵی رژێمی ئەسەد و ئیران و پەیەدە و قەندیل و ھەروەھا ئەوان ئێمە بە خائین دەزانن و ئاڵای ئێمە بە ئاڵا نازانن و سەرکردەکانی ئێمە بە خائین وەسف دەکەن و ئەو کارانەش ناتوانن چالاکییەکانی ئێمە رابگرن وئەوەش ئاشکرایە کە ئەوان ھەمیشە لە ژێر کۆنترۆلی ئیران دان".