"دەستپێشخەرییەكەی بارزانی لەلایەن حزبەكانەوە پێشوازی لێكراوە"

سەرۆكی دیوانی سەرۆكایەتی هەرێمی كوردستان فوئاد حسێن سەردانی سكرتێری گشتی حزبی سۆشیالیست دیموكراتی كوردستان محەمەدی حاجی مەحمودی كرد لە بارەگای تایبەتی خۆی لە گوندی گوڵەخانە (بەدوری 65 كم لە باكووری رۆژهەڵاتی سلێمانی) و كۆبوونەوەیەكی دوو قۆڵییان ئەنجامدا.

دوای كۆبوونەوەكە كە ماوەی سێ‌ سەعاتی خایاند، نوێنەرەكەی بارزانی ئامادەنەبوو هیچ لێدوانێك لەبارەی كۆبوونەوەكە و دەرەنجامی سەردانەكانی قسە بكات، لەلای خۆیەوە محەمەدی حاجی مەحمود لە لێدوانێكیدا گوتی: "ئەوەی ئەمڕۆ باسمان كرد لەسەر هەموو دۆخە سیاسییەكە قسەمان كرد و دەستپێشخەرییەكە لەلایەن سەرۆكی هەرێمی كوردستان كراوە بۆ هەموو حزبەكان، دەستپێشخەرییەكەش خاڵی باش و گرنگی تێدایە و لەلایەن رێكخەری گشتی بزووتنەوەی گۆڕان نەوشیروان مستەفا و بەرپرسانی باڵای یەكێتی نیشتمانی كوردستان گفتوگۆی لەسەر كراوە".

ئەو لەبارەی ناوەڕۆكی دەستپێشخەرییەكەوە گوتی: "پرسی پەرلەمان شتێكی هێندە ئاڵۆز نییە كە چارەسەر نەكرێت و ئەو پێشنیارانەی هاتووە بۆ چارەسەركردنی دۆخی پەرلەمان و حكوومەت و دانوستانەكان لەگەڵ بەغدا و چارەنووسی خەڵكی كوردستان لەگەڵ بەغدا، هەروەها هەوڵ دەدات بۆ چارەسەركردنی دۆخی دارایی هەرێم و چۆنێتی چارەسەركردنی".

بەرپرسەكەی سۆشیالیست بە گەشبینییەوە باسی لە دەرەنجامی كۆبوونەوەی نوێنەرەكەی بارزانی لەگەڵ لایەنەكان كرد و ئاماژەی بەوەش كرد فوئاد حسێن لە سلێمانی دەمێنێتەوەو بەردەوام دەبێت لە دیدار و كۆبوونەوەكانی و لەلایەن بزووتنەوەی گۆڕانیشەوە پێشوازی لە دەستپێشخەرییەكە كراوەو جێگەی ئومێدە.

محەمەدی حاجی مەحمود ئەوەشی گوت: "نیەتی لایەنەكان بەرەو چارەسەری دۆخەكە هەنگاو دەنێت و دەستپێشخەرییەكە وردەكاری و چارەسەری هەموو كێشەكانی لەخۆگرتووە، چاوەڕێی دەرەنجامێكی باشی لێدەكەوێتەوە".

فوئاد حسێن كە وەك نوێنەری تایبەتی سەرۆكی هەرێمی كوردستان مەسعود بارزانی ماوەی چوار رۆژە لە شاری سلێمانییە، سەردانی لایەنە سیاسییەكان دەكات بەمەبەستی گەیاندنی پەیامی سەرۆكی هەرێمی كوردستان مەسعود بارزانی بۆ لایەنەكان و هەوڵدان بۆ گەیشتن بە رێكەوتن و كۆتایی هێنان بە ناكۆكییە سیاسییەكان.

تائێستاش لەگەڵ ئەمیری كۆمەڵی ئیسلامی كوردستان عەلی باپیر و ئەمینداری گشتی یەكگرتووی ئیسلامی كوردستان سەڵاحەدین بەهادین و رێكخەری گشتی بزووتنەوەی گۆڕان نەوشیروان مستەفا و بەرپرسانی یەكێتی نیشتمانی كوردستان و سكرتێری حزبی سۆشیالیست دیموكراتی كوردستان كۆبووەتەوە.