باڵیۆزێکی سعوودیە کوشتنی خاشقچی بە "پەڵە" بۆ سەر وڵاتەکەی ناودەبات

لەندەن - AA

باڵیۆزی سعوودیە لە لەندەن، خالد بن بەندەر ئالسعوود رایگەیاند، تاوانی کوشتنی رۆژنامەنووس جەمال خاشقچی پەڵەیەکە بۆ سعوودیە.

لەلێدوانێکیدا بۆ BBC ئالسعوود لەبارەی کوشتنی خاشقچییەوە گوتی،"ئەوەی نزیکەی ساڵێک لەمەوبەر لە ئیستانبوڵ روویدا، پەڵەیەکە بۆ سەر سعوودیە، کلتورەکەمان، گەلەکەمان و حکوومەتەکەمان."

ناوبراو لەبارەی تاوانەکەوە گوتی،"خۆزگە رووینەدایە".

٢ی تشرینی یەکەمی ٢٠١٨ رۆژنامەنووسی سعوودی جەمال خاشقچی، دوای ئەوەی بۆ کاروباری ھاوسەرگیری سەردانی کۆنسوڵخانەی وڵاتەکەی کرد لە ئیستانبوڵ، ھەر لەوێ کوژرابوو.

کۆمیساری باڵای مافەکانی مرۆڤی سەر بە نەتەوە یەکگرتووەکان لە مانگی حوزەیرانی ئەمساڵ راپۆرتێکی ١٠١ی لاپەرەی لەمبارەیەوە ئامادەکرد و بەرپرسیارێتی کوشتنی قاشقچی خستە ئەستۆی سعوودیە.

ھەر لە راپۆرتەکەدا ئاماژە بەوەشکرابوو کە بۆ لێکۆڵینەوە لەگەڵ شازادەی جێنشینی سعوودیە، محەمەد بن سەلمان و بەرپرسانی باڵای سعوودیە بەڵگەی پێویست لەبەردەستە.

لە راپۆرتەکەدا داوا لە سکرتێری گشتی نەتەوە یەکگرتووەکان، ئەنتۆنیۆ گوتەرێز کراوە کە لێکۆڵینەوەی تەواو لەبارەی کوشتنی قاشقچی دەستپێبکات.