ھەوڵی رێگری ئیسرائیل لە فرۆشتنی فڕۆکەی ئێف-٣٥ بە تورکیا ئاشکرا بوو

قودس - AA

ئەوە ئاشکرا کراوە کە ئیسرائیل بۆ پاراستنی "باڵادەستی" سەربازیی خۆی لە ناوچەکەدا لە ژێر پەردە "کاری کردووە" بۆ رێگری فرۆشتنی فڕۆکەی ئێف-٣٥ بە تورکیا لەلایەن ئەمریکاوە.

بەپێی ھەواڵێکی کەناڵی ١٢ی ئیسرائیلی بەمەبەستی پاراستنی "باڵادەستی" خۆی لە ھێزی سەربازیی ئاسمانی لە ناوچەکەدا،ئیسرائیل لە ژێر پەردە "کاری کردووە" بۆ رێگری فرۆشتنی فڕۆکەی ئێف-٣٥ بە تورکیا لەلایەن ئەمریکاوە.

لە ھەواڵەکەدا باسی کڕینی سیستەمی بەرگری ئێس-٤٠٠ی رووسی بە تورکیا کراوە و ئاماژە بەوەشکراوە کە "ئیسرائیل، کڕینی سیستەمی بەرگری مووشەکی لە رووسیا لەلایەن ئەردۆغان (سەرکۆماری تورکیا)، بە دەرفەت زانیوە و بەمەش گوشاری خستووەتە سەر واشنتۆن بەمەبەستی ھەڵوەشاندنەوەی فڕۆشتی ئەو فڕۆکە پێشکەوتووانە بە تورکیا".

لە ماوەی دوو ساڵی رابردوودا، ئەمریکا ١٦ دانە فڕۆکەی جەنگی ئێف-٣٥ رادەستی ئیسرائیل کردووە و بەمەش ئیسرائیل بووەتە تاکە وڵات کە ببێتە خاوەنی ئەم جۆرە فڕۆکەیە.