لە ھێرشەکانی عەدەن ژمارەی کوژراوان گەیشتە ٤٩ کەس

عەدەن - AA

وەزارەتی ناوخۆیی یەمەن رایگەیاند کە لە ئاکامی ھێرشەکانی ئەمڕۆ بۆ سەر بارەگایەکی سەربازیی و بەڕێوەبەرایەتیەکی ئاسایش لە شاری عەدەن-ی پایتەختی کاتی ئەو وڵاتە، ٤٩ کەس گیانی لەدەستداوە.

یەکەمین لێدوانی فەرمی حکوومەت لەبارەی ھێرشەکانی ئەمڕۆی شاری عەدەن بڵاو کرایەوە.

بەپێی ئەو راگەیەندراوە نووسراوەی لەلایەن وەزارەتی ناوخۆیی یەمەنه‌وه‌ بڵاوکراوەتەوە، لە ئاکامی تەقینەوەی ئۆتۆمبێلێکی بۆمبڕێژکراو بە باخچەی بەڕێوەبەرایەتییەکی ئاسایش لە گەڕەکی عومەر ئەلموختاری شاری عەدەن، ١٣ کەس گیانی لەدەستدا.

لەلایەکی دیکەش حووسییەکان کە ئێران پشتیوانیان دەکات بە فڕۆکەی بێ فڕۆکەوان و مووشەکی بالیستی ھێرشیان کردە سەر سەربازگەی جەلا لە شاری برێقە خۆرئاوای عەدەن کە رێوڕەسمی تێپەڕینی ھێزەکانی حیزام ئەلئەمنی تێدا بەڕێوەچووە کە ئیمارات پشتیوانیان دەکات.

ھەر لە راگەیەندراوەکەدا ئاماژە بەوەشدراوە کە بەھۆی ئەو ھێرشەوە ٣٦ کەس گیانی لەدەستداوە.

بەپێی ھەواڵی تەلەڤیزیۆنی ئەلمەسیرە سەربە حووسییەکان، گوتەبێژی سەربازیی حووسییەکان، یەحیا سەریع باسی لەوە کردووە کە پێگە سەربازییەکان لە سەربازگەی جەلا-یان کردووەتە ئامانج.

سەریع باسی لەوە کردووە کە لەو ھێرشەی بە فڕۆکەی بێ فڕۆکەوان و مووشەکی بالیستی مەدوا مامناوەند ئەنجامیانداوە، دەیان کەس کوژراو و برینداربوون.