ھێرشی حووسییەكان بۆسەر سەربازگەیەكی سعوودیە

یەمەن ـ AA

گوتەبێژی حووسییەكان، یەحیا سەریع رایگەیاند كە مووشەكێكی بالیستیان ئاراستەی سەربازگەیەك لە باشووری رۆژئاوای سعوودیە كردووە.

یەحیا سەریع لە ھەژماری تایبەتی خۆی لە تۆڕی كۆمەڵایەتی فەیسبووك بڵاویكردووەتەوە: "مووشەكێكی بالیستی جۆری "بەدر - F"مان ئاراستەی سەربازگەیەك لە پارێزگای نەجران باشووری رۆژئاوای سعوودیە كردووە".

یەحیا سەریع راشیگەیاندووە كە مووشەكەكە بە جۆرێك ئامانجەكەی پێكاوە كە دەیان سەربازی سعوودیە و یەمەن كوژران و برینداربوون.

یەحیا سەریع باسی لەوەشكردووە، مووشەكە بالیستییەكە لەو كاتەدا ئاراستەی سەربازگەكەیان كردووە كە هاوپەیمانیەتی عەرەبی بە رابەرایەتی سعوودیە ئامادەكاری دەكرد بۆ ئەوەی پێگەی حووسییەكان لە یەمەن بكاتە ئامانج.

ھیچ روونكردنەوە و زانیارییەك لەو بارەیەوە لە لایەن سعوودیە و سوپای یەمەنەوە بڵاونەكراوەتەوە.