گۆڤاری ئه‌نوار پێویستییه‌كانی یانه‌ی مووسڵ دابین ده‌كات

هه‌ولێر-AA
گۆڤاری ئه‌نوار ده‌یه‌وێت یانه‌ی وەرزشی مووسڵ بگه‌ڕێنێته‌وه‌ بۆ خولی یانه‌كانی عێراق و بره‌و به‌ توانای یاریزانان بدات.
ئه‌مڕۆ گۆڤاری ئه‌نوار گرێبه‌ستێكی له‌گه‌ڵ سه‌رۆكی یانه‌ی وه‌زرشی مووسڵ، رائید عوبه‌یدی واژوو كرد كه‌ بریتییه‌ له‌وه‌ی گۆڤاره‌كه‌ و بۆ ماوه‌ی یه‌ك ساڵ هه‌ڵده‌ستێك به‌ دابینكردنی سه‌رجه‌م پێویستییه‌كانی یانه‌كه‌ له‌ مووچه‌ی كارمه‌ندان و گرێبه‌ستی یاریزانان و هه‌روه‌ها پێویستییه‌كانی گواستنه‌وه‌ و مه‌شق و راهێنان.
گرێبه‌سته‌ له‌ رێوڕه‌سمێكدا له‌ هۆتێل چوارچرا لە شاری هەولێر به‌ ئاماده‌بوونی ژماره‌یه‌ك له‌ به‌رپرسانی یانه‌ی مووسڵ و یاریزانی یانه‌كه‌ له‌ یارییه‌ جۆراوجۆره‌كان واژوو کرا.
سه‌رنووسه‌ری گۆڤاری ئه‌نوار و سه‌رۆكی رێكخراوی خێرخوازی ئه‌نوار، ئه‌نوار حه‌مدانی له‌ لێدوانێكدا بۆ ئاژانسی ئانادۆڵو گوتی "سوپاس بۆ خوا ئه‌مڕۆ گرێبه‌ستێكمان له‌گه‌ڵ یانه‌ی وەرزشی مووسڵ واژوو کرد به‌ ئاماده‌بوونی سه‌رۆكی یانه‌ كه‌ بریتییه‌ له‌وه‌ی ئێمه‌ هه‌ڵده‌ستین به‌ له‌خۆگرتنی سه‌رجه‌م پێویستییه‌كانی یانه‌كه‌ بۆ ماوه‌ی ساڵێك هه‌ر له‌ مووچه‌ و گرێبه‌ستی یاریزانان تا پێویستییه‌كانی یاریزانان و مه‌شق و پێویستیه‌كانی یاریكردن و یانه‌ی مووسڵ به‌گشتی".
له‌باره‌ی هۆكاری واژووكردنی گرێبه‌سته‌كه‌ش حه‌مدانی روونی كرده‌وه‌ "پاش ئه‌و بارودۆخه‌ی له‌ساڵی 2014 به‌سه‌ر مووسڵ و پارێزگای نه‌ینه‌وادا هات كه‌ پارێزگاكه‌ی بۆ دواوه‌ له‌هه‌موو رووه‌كانه‌وه‌ گه‌ڕانده‌وه‌، ده‌مانه‌وێت گیانی وه‌رزشی بۆ شاری مووسڵ و پارێزگای نه‌ینه‌وا به‌گشتی بگه‌ڕێنینه‌وه‌ ئه‌مه‌ش له‌رێگه‌ی ئه‌م گرێبه‌سته‌وه‌ كه‌ ئێمه‌ هه‌ڵده‌ستین به‌ پڕكردنه‌وه‌ و دابینكردنی سه‌رجه‌م پێویستییه‌كانی یانه‌كه‌ به‌مه‌به‌ستی به‌شدارییكردنه‌وه‌ی له‌ خوله‌كانی عێراق و دواتریش له‌ ده‌ره‌وه‌ی عێراقیشدا".
رێوڕه‌سمه‌كه‌ ژماره‌یه‌ك له‌ هه‌وادارانی یانه‌ی مووسڵیش له‌خۆ گرت كه‌ بۆ رێوڕەسمی واژووكردن له‌سه‌ر ئه‌و گرێبه‌سته‌ له‌نێوان هه‌ردوو لایه‌نی رێكخراوی خێرخوازی ئه‌نوار و یانه‌ی وەرزشی مووسڵ واژوو كرا.